190 ملین پاؤنڈ کیس: عمران اور بشریٰ کی اپیلیں سماعت کیلئے مقرر
اسلام آباد ہائیکورٹ کے چیف جسٹس سردار محمد سرفراز ڈوگر اور جسٹس محمد آصف پر مشتمل دو رکنی بینچ اپیلوں پر سماعت کرے گا۔
عمران خان اور بشریٰ بی بی نے احتساب عدالت کی جانب سے سنائی گئی سزاؤں کو اسلام آباد ہائیکورٹ میں چیلنج کر رکھا ہے۔ احتساب عدالت نے 190 ملین پاؤنڈ ریفرنس میں عمران خان کو 14 سال جبکہ بشریٰ بی بی کو 7 سال قید کی سزا سنائی تھی۔
کیس کا پس منظر
190 ملین پاؤنڈ کیس، جسے القادر ٹرسٹ کیس بھی کہا جاتا ہے، قومی احتساب بیورو (نیب) کی جانب سے دائر کیا گیا تھا۔ ریفرنس میں الزام عائد کیا گیا تھا کہ برطانیہ کی نیشنل کرائم ایجنسی (این سی اے) کی جانب سے پاکستان کو واپس بھیجی گئی 190 ملین پاؤنڈ کی رقم کے معاملے میں عمران خان کی حکومت نے نجی سوسائٹی کو مالی فائدہ پہنچایا، جبکہ اس کے بدلے القادر ٹرسٹ کے لیے زمین اور دیگر فوائد حاصل کیے گئے۔
یہ بھی پڑھیں: مریم نواز کا چوہدری سالک کو نوٹس بھجوانے کا اعلان
احتساب عدالت نے 17 جنوری 2025 کو محفوظ فیصلہ سناتے ہوئے عمران خان اور بشریٰ بی بی کو سزا سنائی تھی، جس کے بعد دونوں نے فیصلے کے خلاف اسلام آباد ہائیکورٹ سے رجوع کیا۔
اس سے قبل اکتوبر میں اسلام آباد ہائیکورٹ میں اپیلوں پر سماعت ہوئی تھی، تاہم عمران خان کے وکیل بیرسٹر سلمان صفدر کی جانب سے التوا کی درخواست دائر کیے جانے کے بعد کارروائی ملتوی کر دی گئی تھی۔ وکیل نے مؤقف اختیار کیا تھا کہ اپیلوں کی مؤثر پیروی کے لیے عمران خان اور بشریٰ بی بی سے ملاقات کرکے ضروری ہدایات حاصل نہیں کی جا سکیں۔
اب 10 نومبر کو ہونے والی سماعت میں دونوں کی سزا کے خلاف اپیلوں پر مزید کارروائی متوقع ہے۔ اس سماعت میں کیس کی آئندہ پیش رفت کے حوالے سے اہم پیش رفت سامنے آ سکتی ہے۔
