اسلام آباد میں سعودی سرمایہ کاری سے پاکستان کا پہلا تھیم پارک بنے گا
تھیم پارک منصوبے کے معاہدے پر دستخط کی تقریب تاریخی قذافی اسٹیڈیم میں منعقد ہوئی، جس میں وفاقی وزیر داخلہ اور چیئرمین پاکستان کرکٹ بورڈ محسن نقوی مہمان خصوصی تھے۔
مفاہمت کی یادداشت پر سعودی پاکستان بزنس کونسل کے چیئرمین شہزادہ منصور بن محمد السعود اور چیئرمین کیپیٹل ڈیولپمنٹ اتھارٹی (سی ڈی اے) سہیل اشرف نے دستخط کیے۔
یہ بھی پڑھیں: وزیر اعظم کا 5 لاکھ طلبا کو کروم بکس اور انٹرنیٹ فراہم کرنے کا اعلان
محسن نقوی نے معاہدے کا خیرمقدم کرتے ہوئے شہزادہ منصور بن محمد السعود کو مبارکباد دی۔ معاہدے کے تحت سعودی سرمایہ کار اسلام آباد میں تھیم پارک کی تعمیر کے لیے سرمایہ کاری کریں گے، جبکہ سی ڈی اے اس منصوبے کے لیے اراضی فراہم کرے گی۔
اس موقع پر محسن نقوی نے کہا کہ سعودی عرب سے آئے معزز مہمانوں کا دل کی گہرائیوں سے خیرمقدم کرتے ہیں۔ اسلام آباد کے انفراسٹرکچر کو جدید ترین شہروں کی طرز پر ترقی دی جا رہی ہے اور سعودی سرمایہ کاروں کو ہر ممکن سہولت فراہم کی جائے گی۔
وفاقی وزیر داخلہ کا کہنا تھا کہ تھیم پارک منصوبہ گیم چینجر ثابت ہوگا۔ آئندہ چند ماہ کے دوران سعودی عرب میں رئیل اسٹیٹ کے حوالے سے روڈ شو منعقد کرنے کا منصوبہ بھی بنایا جا رہا ہے۔
شہزادہ منصور بن محمد السعود نے کہا کہ پاکستان، خصوصاً اسلام آباد میں سرمایہ کاری کے بہترین مواقع موجود ہیں۔ تقریب میں سی ڈی اے کے ارکان اور سعودی وفد کے دیگر اراکین بھی شریک ہوئے۔
