وزیر اعظم کا 5 لاکھ طلبا کو کروم بکس اور انٹرنیٹ فراہم کرنے کا اعلان

اسلام آباد میں کروم بکس اور انٹرنیٹ سہولت کی فراہمی کے اجرا کی تقریب منعقد ہوئی، جس میں وزیراعظم شہباز شریف نے نمایاں کارکردگی دکھانے والے طلبا میں کروم بکس تقسیم کیں۔

اس موقع پر وزیراعظم نے کہا کہ طلبا پاکستان کا حقیقی اثاثہ اور باصلاحیت نوجوان ملک کا قیمتی سرمایہ ہیں۔ حکومت طلبا کو بااختیار بنانے کے سفر کا آغاز کر رہی ہے۔

یہ بھی پڑھیں: موسم خشک رہے گا یا بارش ہوگی؟ اہم پیشگوئی

شہباز شریف کا کہنا تھا کہ ماضی میں مسلم لیگ (ن) نے ملک بھر سمیت آزاد کشمیر میں قابلیت کی بنیاد پر 6 لاکھ لیپ ٹاپ تقسیم کیے تھے۔ اب 5 لاکھ کروم بکس دو سال کے دوران ملک بھر کے طلبا میں تقسیم کی جائیں گی۔

وزیراعظم نے کہا کہ دانش اسکولوں میں طلبا کو تمام سہولیات مفت فراہم کی جا رہی ہیں۔ کروم بکس بھی صرف میرٹ اور قابلیت کی بنیاد پر تقسیم کی جا رہی ہیں تاکہ طلبا دنیا میں کہیں بھی موجود ہوں، وہ آن لائن تعلیم حاصل کرنے کا سلسلہ جاری رکھ سکیں اور جدید تعلیمی مواقع سے فائدہ اٹھاتے ہوئے کسی سے پیچھے نہ رہیں۔