سرکاری ملازمین کی غیر ملکی شہریت سے متعلق اہم فیصلہ
تفصیلات کے مطابق اسٹیبلشمنٹ ڈویژن نے سول سرونٹس ڈسکلوژر اینڈ ریگولیشن آف فارن نیشنلٹی رولز 2026 پر عمل درآمد کے لیے آفس میمورنڈم جاری کر دیا۔ اس میمورنڈم کے ذریعے تمام متعلقہ وزارتوں اور ڈویژنز کو نئے قواعد پر عمل درآمد یقینی بنانے کی ہدایت کی گئی ہے۔
جاری ہدایات کے مطابق سرکاری ملازمین کو قواعد کے اجرا کے بعد 90 روز کے اندر غیر ملکی شہریت سے متعلق ڈیکلیئریشن جمع کرانا ہوگا۔ اس مقصد کے لیے مخصوص پرفارما بھی جاری کر دیا گیا ہے تاکہ ملازمین مطلوبہ معلومات مقررہ طریقہ کار کے تحت فراہم کر سکیں۔
نئے قواعد کے تحت سول سرونٹس سے صرف اپنی غیر ملکی شہریت کی تفصیلات ہی نہیں بلکہ غیر ملکی سفری دستاویزات اور کسی غیر ملکی شہری سے شادی سے متعلق معلومات بھی طلب کی جائیں گی۔
اس کے علاوہ سرکاری ملازمین کے زیرِ کفالت افراد کی غیر ملکی شہریت اور سفری دستاویزات کی تفصیلات بھی فراہم کرنا ہوں گی۔ اسٹیبلشمنٹ ڈویژن نے تمام وزارتوں اور ڈویژنز کو ہدایت کی ہے کہ وہ اپنے ماتحت افسران سے متعلق مطلوبہ معلومات جمع کرکے فراہم کریں۔
حکومتی ہدایات کے مطابق متعلقہ اداروں کو نئے قواعد پر عمل درآمد کے لیے ضروری اقدامات کرنا ہوں گے۔ سرکاری ملازمین کو مقررہ مدت کے اندر مطلوبہ ڈیکلیئریشن جمع کرانے کی ہدایت کی گئی ہے تاکہ اس عمل کو مکمل کیا جا سکے۔
یہ بھی پڑھیں:تبت میں خوفناک زلزلہ،16 افراد ہلاک، 65 زخمی
نئے قواعد کے تحت معلومات کی فراہمی کا مقصد سرکاری ملازمین کی غیر ملکی شہریت اور متعلقہ سفری دستاویزات کا ریکارڈ مرتب کرنا ہے۔
