مری میں سکول وین کو حادثہ، 11 بچے جھلس گئے
ڈی پی او مری کے مطابق 4 شدید جھلسے بچوں کو ہولی فیملی ہسپتال راولپنڈی منتقل کردیا گیا ہے، جبکہ 7 بچوں کو ڈسٹرکٹ ہیڈکوارٹر ہسپتال مری منتقل کیا گیا ہے۔
دریں اثنا ریسکیو اور پولیس مشترکہ امدادی کارروائیوں میں مصروف ہیں۔
ڈی پی او مری رضا تنویر کے مطابق وین میں 2 نجی سکولوں کے بچے سوار تھے۔ متاثرہ بچوں میں 8 سالہ ارحم ولد علی نواز تقریباً 38 فیصد جھلسنے سے زخمی ہوا، جبکہ 8 سالہ حسن طالب ولد محمد طالب کو تقریباً 26 فیصد جھلسنے کے باعث گہرے زخم آئے ہیں۔
اسی طرح عائشہ دختر کلیم تقریباً 42 فیصد جھلسنے کے زخموں سے شدید متاثر ہوئی ہے۔ پولیس کے مطابق باقی 8 بچے اس وقت مستحکم حالت میں ہیں۔ ان 8 بچوں میں سے 2 بچے جھلسنے سے محفوظ رہے، جبکہ باقی 6 بچوں کو 10 فیصد سے کم جھلسنے کے زخم آئے ہیں۔
یہ بھی پڑھیں: پیٹرول سبسڈی اسکیم سے فائدہ اٹھانے والوں کیلئے اہم اعلان
امدادی کارروائی کے دوران گاڑی میں لگنے والی آگ پر قابو پالیا گیا ہے، جبکہ جائے حادثہ پر کولنگ کا عمل جاری ہے۔
بعد ازاں ڈی پی او مری رضا تنویر سپرا نے ڈسٹرکٹ ہیڈ کوارٹرز اسپتال مری میں میڈیا سے گفتگو کرتے ہوئے بتایا کہ بدقسمتی سے اسکول وین حادثے کا شکار ہوگئی، جس کی وجہ بریک فیل ہونا بتائی گئی ہے۔ حادثے کے فوری بعد وین میں آگ لگ گئی، جس میں 4 بچوں کا جسم 25 فیصد سے زیادہ جل گیا۔
انہوں نے بتایا کہ زیادہ متاثر بچوں کو راولپنڈی کے اسپتال میں ریفر کیا گیا ہے۔ وین میں 12 بچے سوار تھے، جن کو وین والے نے مختلف علاقوں سے پک کیا۔ ابتدائی طور پر بچوں کو فرسٹ ایڈ فراہم کردی گئی تھی۔ 8 معمولی جلنے والے بچوں کا ڈی ایچ کیو اسپتال مری میں علاج کیا جارہا ہے۔
انہوں نے بتایا کہ 2 ماہ پہلے بھی مری میں وین میں اگ لگنے کا افسوسناک واقع پیش آیا تھا۔ اس واقع کے بعد ہم گاڑیوں کی فٹنس چیکنگ لوکل شاہراہوں تک لے کر جائیں گے۔ ڈی پی او مری کے مطابق دیہاتوں کے اندر چلنے والی گاڑیوں کی فٹنس بھی چیک کریں گے تاکہ ایسے واقعات کو روکا جاسکے۔
