ملک کے مختلف حصوں میں بارش کی پیشگوئی
محکمہ موسمیات کے مطابق آج 20 ستمبر 2026 کو ملک کے بیشتر علاقوں میں موسم خشک رہنے کی توقع ہے، تاہم بالائی خیبرپختونخوا، کشمیر، گلگت بلتستان اور دریائے سندھ کے بالائی علاقوں میں بعض مقامات پر گرج چمک کے ساتھ بارش ہوسکتی ہے۔
محکمہ موسمیات کے مطابق خیبرپختونخوا کے مختلف علاقوں میں بھی بارش کا امکان ہے۔ چترال، کوہستان، مانسہرہ، سوات اور دیر میں بعض مقامات پر گرج چمک کے ساتھ بارش متوقع ہے، جس کے باعث ان علاقوں میں موسم خوشگوار ہونے کا امکان ہے۔
گلگت بلتستان کے مختلف علاقوں میں بھی بادل برس سکتے ہیں، استور، داریل، دیامر اور تانگیر میں کہیں کہیں گرج چمک کے ساتھ بارش کا امکان ظاہر کیا گیا ہے۔
آزاد کشمیر کے علاقے نیلم میں بھی بارش کی پیشگوئی کی گئی، ان علاقوں میں بارش کے باعث درجہ حرارت میں معمولی کمی اور موسم میں تبدیلی متوقع ہے۔
دوسری جانب ملک کے بیشتر میدانی اور دیگر علاقوں میں موسم خشک رہنے کا امکان ہے۔ شہریوں کو مشورہ دیا گیا ہے کہ بالائی علاقوں کا سفر کرنے والے افراد موسم کی تازہ صورتحال سے آگاہ رہیں، خصوصاً ان علاقوں میں جہاں گرج چمک کے ساتھ بارش کی پیشگوئی کی گئی ہے۔
یہ بھی پڑھیں:عمران خان کے طبی معائنے کیلئے ڈاکٹرز کی ٹیم اڈیالہ جیل پہنچ گئی
محکمہ موسمیات نے آئندہ دنوں کے دوران بھی موسم کی صورتحال پر نظر رکھنے اور تازہ پیشگوئی سے آگاہ رہنے کی ہدایت کی ہے۔
