جمائما نے وزیر دفاع خواجہ آصف کو آڑے ہاتھوں لے لیا

یہ معاملہ خواجہ آصف کی سوشل میڈیا پلیٹ فارم ایکس پر ایک پوسٹ کے بعد سامنے آیا، جس میں انہوں نے کہا تھا کہ مرکزی دھارے کی یہودی روایت کے مطابق یہودی شناخت ماں کے نسب سے طے ہوتی ہے۔

وزیر دفاع نے لکھا کہ اگر کسی کی والدہ یہودی ہو تو والد کا مذہب کچھ بھی ہو اسے یہودی تصور کیا جاتا ہے۔ انکے مطابق یہ روایت اس تاریخی تصور سے جڑی ہے کہ ماضی میں ماں کی نسبت یقینی طور پر معلوم ہوتی تھی جبکہ والد کی نسبت کی تصدیق ہمیشہ ممکن نہیں تھی۔

خواجہ آصف کی پوسٹ پر جواب دیتے ہوئے جمائما نے کہا کہ وزیر دفاع کا بیان اپنی جگہ درست ہے تاہم اسی اصول کے تحت یہودی برادری نے انہیں کبھی یہودی تسلیم نہیں کیا۔

یہ بھی پڑھیں: پی ٹی آئی کا اسلام آباد لانگ مارچ کا پلان سامنے آگیا

جمائما کے مطابق ان کی والدہ چرچ آف انگلینڈ سے وابستہ پروٹسٹنٹ تھیں جبکہ ان کے والد کی والدہ فرانسیسی کیتھولک تھیں، اس لیے اسی اصول کے مطابق ان کے والد کو بھی یہودی نہیں سمجھا جائے گا۔

جمائما نے مزید کہا کہ ان کے بیٹوں کو نیچا دکھانے کی کوشش میں وزیر دفاع نے ایک بار پھر خود ہی اپنے لیے شرمندگی کی صورتحال پیدا کر لی ہے۔

دوسری جانب خواجہ آصف نے بعد ازاں وضاحت کرتے ہوئے کہا کہ ان کی پوسٹ کے مقصد کسی فرد یا خاندان کو نشانہ بنانا نہیں تھا۔ انہوں نے کہا کہ وہ صرف ایک مذہبی اصول بیان کر رہے تھے اور تمام اہلِ کتاب کا احترام کرتے ہیں۔