عمران خان کے طبی معائنے کیلئے ڈاکٹرز کی ٹیم اڈیالہ جیل پہنچ گئی
ذرائع کے مطابق طبی ٹیم میں الشفا ٹرسٹ آئی ہسپتال اور پمز ہسپتال کے ڈاکٹرز اور پیرا میڈیکل اسٹاف شامل ہیں، ٹیم کی سربراہی پمز ہسپتال کے ڈاکٹر عارف خان کر رہے ہیں۔
ذرائع کا کہنا ہے کہ عمران خاں کے طبی معائنے کے دوران مختلف اہم طبی امور کا جائزہ لیا جائے گا۔ اس سلسلے میں بلڈ پریشر، کولیسٹرول اور آنکھوں کا معائنہ بھی شامل ہے۔ طبی ٹیم جدید آلات کے ہمراہ اڈیالہ جیل پہنچی ہے تاکہ ضروری طبی جانچ مکمل کی جاسکے۔
میڈیکل ٹیم کی جانب سے طبی معائنے کے بعد عمران خاں کی صحت سے متعلق رپورٹس مرتب کیے جانے کا امکان ہے، جبکہ ضرورت پڑنے پر مزید طبی اقدامات سے متعلق سفارشات بھی سامنے آسکتی ہیں۔
واضح رہے کہ اس سے قبل بھی بانی پی ٹی آئی کے طبی معائنے کیلئے پمز اور الشفا ٹرسٹ آئی ہسپتال کے ڈاکٹرز پر مشتمل ٹیمیں اڈیالہ جیل کا دورہ کرچکی ہیں۔ فروری 2026 میں ہونے والے ایک تفصیلی طبی معائنے میں پمز اور الشفا ٹرسٹ آئی ہسپتال کے ماہرین شامل تھے۔
یہ بھی پڑھیں:آئی جی خیبر پختونخوا نے افسران کو معاونت سے روک دیا
حالیہ طبی معائنے کے حوالے سے ذرائع کا کہنا ہے کہ ڈاکٹرز بانی پی ٹی آئی کی مجموعی صحت کا جائزہ لیں گے اور مختلف ٹیسٹوں کے نتائج کی روشنی میں آئندہ کے طبی اقدامات کا تعین کیا جائے گا۔
طبی معائنے کا عمل مکمل ہونے کے بعد اس حوالے سے مزید تفصیلات سامنے آنے کی توقع ہے۔
