سہیل آفریدی کی ناصر عباس اور محمود خاں اچکزئی سےاہم ملاقات
ملاقات کے دوران پنجاب میں جاری سیاسی سرگرمیوں، سیاسی کارکنوں کیخلاف اقدامات اور آئندہ کے لائحہ عمل پر بھی گفتگو ہوئی۔
اپوزیشن رہنماؤں نے پنجاب حکومت کی جانب سے سیاسی کارکنوں کیخلاف کیے جانے والے اقدامات پر تشویش کا اظہار کیا۔
رہنماؤں نے 27 ستمبر کو ہونے والے مارچ کے حوالے سے بھی تفصیلی مشاورت کی، مارچ کو پُرامن، آئینی اور جمہوری رکھا جائے گا اور سیاسی و آئینی حقوق کیلئے آواز اٹھائی جائے گی۔
ملاقات میں صوبوں کے آئینی حقوق، آئین کی بالادستی اور جمہوری اصولوں کے تحفظ سے متعلق امور بھی زیر بحث آئے۔ رہنماؤں نے سیاسی اختلافات کے اظہار کے آئینی حق اور سیاسی کارکنوں کے حقوق پر زور دیا۔
ترجمان کے مطابق تحریک تحفظ آئین پاکستان کے سربراہی اجلاس کا بھی فیصلہ کیا گیا، جس میں 27 ستمبر کے مارچ سمیت اپوزیشن اتحاد کی آئندہ سیاسی حکمت عملی پر مشاورت کی جائے گی۔
دوسری جانب اپوزیشن رہنماؤں نے سہیل آفریدی کی جانب سے پنجاب میں جاری سیاسی سرگرمیوں سے متعلق بریفنگ بھی سنی۔ ملاقات میں آئندہ کے سیاسی لائحہ عمل اور مختلف جماعتوں کے درمیان رابطوں کو جاری رکھنے پر بھی گفتگو ہوئی۔
یہ بھی پڑھیں:پی ٹی آئی رہنما اعجاز ستی دل کا دورہ پڑنے سے انتقال کر گئے
27 ستمبر کے مارچ کے حوالے سے اپوزیشن قیادت کا کہنا ہے کہ آئندہ کے فیصلے مشاورت سے کیے جائیں گے، جبکہ سربراہی اجلاس میں مارچ سمیت دیگر سیاسی امور پر مزید غور کیا جائے گا۔
