پی ٹی آئی رہنما اعجاز ستی دل کا دورہ پڑنے سے انتقال کر گئے
خاندانی ذرائع کے مطابق گرفتاری کے بعد پولیس گاڑی میں لے جاتے ہوئے انہیں دل کا دورہ پڑا۔
تفصیلات کے مطابق اعجاز ستی کو تھانہ ویسٹریج پولیس نے گرفتار کیا تھا، پولیس انہیں گاڑی میں بٹھا کر لے جا رہی تھی کہ راستے میں ان کی طبیعت اچانک خراب ہوگئی اور مبینہ طور پر دل کا دورہ پڑا۔
ذرائع کا کہنا ہے کہ اعجاز ستی کو طبی امداد کے لیے ہسپتال منتقل کیا گیا، تاہم وہ جانبر نہ ہوسکے، رپورٹس کے مطابق پولیس ان کی لاش ڈی ایچ کیو ہسپتال چھوڑ کر چلی گئی۔ واقعے کی مزید تفصیلات اور موت کی حتمی وجہ متعلقہ حکام کی تصدیق کے بعد سامنے آنے کا امکان ہے۔
واضح رہے کہ اعجاز ستی کا شمار راولپنڈی میں پاکستان تحریک انصاف کے مقامی رہنماؤں میں ہوتا تھا۔ وہ کینٹ بورڈ وارڈ نمبر 6 سے پی ٹی آئی کے امیدوار بھی رہ چکے ہیں۔
دوسری جانب واقعے کے حوالے سے مختلف رپورٹس سامنے آئی ہیں، تاہم پولیس کی جانب سے موت کی حتمی وجہ اور واقعے کی مکمل تفصیلات سے متعلق باضابطہ مؤقف سامنے آنا باقی ہے۔
یہ بھی پڑھیں:رکن پنجاب اسمبلی چوہدری محمد حنیف جٹ انتقال کرگئے
اعجاز ستی کی اچانک موت کی خبر پھیلنے کے بعد مقامی سیاسی حلقوں اور کارکنوں میں تشویش پائی جا رہی ہے۔ واقعے کے محرکات اور موت کے حالات کے بارے میں مزید معلومات متعلقہ حکام کی تحقیقات اور سرکاری بیان کے بعد واضح ہوں گی۔
