محکمہ موسمیات نے مختلف شہروں میں بارشوں کی پیشگوئی کر دی
تفصیلات کے مطابق لاہور میں آج بارش کے 95 فیصد امکانات ظاہر کیے گئے ہیں جبکہ شہر میں سورج اور بادلوں کے درمیان آنکھ مچولی کا سلسلہ بھی جاری ہے، لاہور کا موجودہ درجہ حرارت 30 ڈگری سینٹی گریڈ ریکارڈ کیا گیا ہے۔
محکمہ موسمیات کے مطابق لاہور میں زیادہ سے زیادہ درجہ حرارت 33 جبکہ کم سے کم 24 ڈگری سینٹی گریڈ رہنے کا امکان ہے۔ شہر میں ہوا میں نمی کا تناسب 71 فیصد ریکارڈ کیا گیا جبکہ ہوائیں 5 کلومیٹر فی گھنٹہ کی رفتار سے چل رہی ہیں۔ دن بھر موسم جزوی طور پر ابر آلود رہنے کی توقع ہے۔
دوسری جانب اسلام آباد میں بھی موسم جزوی طور پر ابر آلود رہنے کی پیشگوئی کی گئی ہے، بعض مقامات پر گرج چمک کے ساتھ موسلا دھار بارش ہوسکتی ہے۔
اسلام آباد میں گزشتہ روز کے مقابلے میں درجہ حرارت میں 2 ڈگری سینٹی گریڈ کمی ریکارڈ کی گئی۔ صبح کے اوقات میں درجہ حرارت 19 ڈگری سینٹی گریڈ رہا جبکہ دن کے دوران درجہ حرارت 27 ڈگری تک جانے کا امکان ہے۔ شہر میں ہوائیں 7 کلومیٹر فی گھنٹہ کی رفتار سے چلنے جبکہ ہوا میں نمی کا تناسب 78 فیصد سے زائد رہنے کی توقع ہے۔
کشمیر اور بالائی خیبرپختونخوا میں بھی دن کے اوقات میں گرج چمک کے ساتھ بارش کا امکان ہے، گلگت بلتستان میں مطلع جزوی طور پر ابر آلود رہنے اور بعض مقامات پر بارش کی توقع ظاہر کی گئی ہے۔
یہ بھی پڑھیں:سوات میں زلزلے کے شدید جھٹکے، شہری خوفزدہ
کراچی میں موسم گرم اور مرطوب رہنے کا امکان ہے، سمندری ہوائیں بند ہونے کے باعث گرمی کی شدت برقرار رہنے کی پیشگوئی کی گئی ہے۔ کراچی کا موجودہ درجہ حرارت 30 ڈگری سینٹی گریڈ ریکارڈ ہوا جبکہ کم سے کم درجہ حرارت 28 ڈگری رہا۔ شہر میں زیادہ سے زیادہ درجہ حرارت 32 سے 34 ڈگری سینٹی گریڈ کے درمیان رہنے کا امکان ہے۔
محکمہ موسمیات کے مطابق کراچی میں ہوا میں نمی کا تناسب 78 فیصد ریکارڈ کیا گیا جبکہ فضائی معیار تسلی بخش ہے۔
