ای بائیکس اپلائی کرنے والوں کیلئے حکومت کا بڑا اعلان
تفصیلات کے مطابق ای بائیک اسکیم میں طلبہ و طالبات کی سہولت کیلئے 5 سکوٹی ڈرائیونگ ٹریننگ سکولز قائم کیے گئے ہیں، جبکہ تمام لائسنس سینٹرز میں جین زی کاؤنٹرز بھی بنائے گئے ہیں۔ طلبہ و طالبات کو سکوٹی لائسنس کیلئے شناختی کارڈ، ب فارم اور والدین یا سرپرست کو ہمراہ لانے کی ہدایت کی گئی ہے۔
جاری کردہ اعداد و شمار کے مطابق اب تک ایک لاکھ 72 ہزار سے زائد موٹرسائیکل لائسنس جبکہ 6 ہزار 546 جونیئر پرمٹ جاری کیے جاچکے ہیں۔ لاہور میں آبشار ڈرائیونگ سکول، لبرٹی خدمت مرکز اور گریٹر اقبال پارک میں سکوٹی ٹریننگ سکول قائم کیے گئے ہیں۔
اس کے علاوہ ٹریفک پولیس لائنز مناواں اور ایل او ایس فیروزپور روڈ پر بھی سکوٹی ٹریننگ سکولز قائم کیے گئے ہیں، جہاں شہریوں خصوصاً خواتین کو ڈرائیونگ سیکھنے کی سہولت فراہم کی جارہی ہے۔
سی ٹی او لاہور کے مطابق ایل او ایس فیروزپور روڈ پر قائم سکوٹی سکول میں صرف خواتین کو مفت سکوٹی چلانے کی تربیت دی جارہی ہے۔ ٹریفک پولیس کے ڈرائیونگ سکولز سے پہلے ہی ہزاروں خواتین ڈرائیونگ کی تربیت حاصل کرکے بااعتماد ڈرائیور بن چکی ہیں۔
یہ بھی پڑھیں:بی آئی ایس پی تعلیمی وظائف کیلئے رجسٹریشن کا آسان طریقہ جانیے
سی ٹی او سید عبدالرحیم شیرازی کا کہنا ہے کہ سکوٹی سکولز میں خواتین کو ویمن ٹو ویمن سروس فراہم کی جارہی ہے۔ خواتین کو ڈرائیونگ کی تربیت دے کر خودمختار اور بااختیار بنانے کا سلسلہ جاری ہے، کیونکہ خواتین بااختیار ہوں گی تو معاشرے میں مثبت اور واضح تبدیلی آئے گی۔
