سرکاری اساتذہ کیلئے بڑی خوشخبری کا اعلان
ذرائع کے مطابق سندھ کے تمام ڈویژنز کو پرائمری ٹیچرز کی سینیارٹی لسٹ آن لائن جاری کرنے کی ہدایت کردی گئی ہے، جبکہ متعلقہ حکام کو یہ فہرست 15 روز کے اندر محکمہ اسکولز کی ویب سائٹ پر اپ لوڈ کرنے کا حکم دیا گیا ہے۔
اس حوالے سے کراچی اور حیدرآباد سمیت سندھ کے 6 ڈویژنز کو باقاعدہ خط بھی ارسال کردیا گیا ہے، سینیارٹی لسٹ آن لائن ہونے کے بعد اساتذہ کو اگلے گریڈ میں ترقی دینے کا عمل شروع کیا جائے گا۔
محکمہ اسکولز کے فیصلے کے مطابق گریڈ 14 کے پرائمری ٹیچرز کو گریڈ 16 میں ترقی دی جائے گی، جبکہ ترقی پانے والے اساتذہ کو ہائی اسکول ٹیچر کے عہدے پر تعینات کیا جائے گا۔
ذرائع کا کہنا ہے کہ ترقیوں کے عمل میں شفافیت اور کاغذی کارروائی میں کمی کیلئے اساتذہ کے اعتراضات بھی آن لائن وصول کیے جائیں گے۔ اس کے علاوہ موصول ہونے والے اعتراضات کا ازالہ بھی آن لائن طریقے سے کرنے کا فیصلہ کیا گیا ہے۔
یہ بھی پڑھیں:لاہور سمیت مختلف شہروں میں بارش کی پیشگوئی
محکمہ اسکولز کے اس اقدام سے سینیارٹی، ترقی اور اعتراضات کے عمل کو مزید شفاف بنانے کے ساتھ ساتھ اساتذہ کو دفاتر کے چکر لگانے اور غیر ضروری کاغذی کارروائی سے بھی نجات ملے گی۔
