معروف تاجر صلاح الدین نورزئی قاتلانہ حملے میں جاں بحق
پولیس کے مطابق فائرنگ کا افسوسناک واقعہ کوئٹہ میں ائیرپورٹ پولیس تھانے کی حدود میں پیش آیا، جہاں تاجر صلاح الدین نورزئی مسجد سے نماز کی ادائیگی کے بعد اپنے گھر کی جانب جا رہے تھے۔
پولیس کا کہنا ہے کہ راستے میں نامعلوم افراد نے انہیں نشانہ بنایا اور فائرنگ کردی۔ گولیاں لگنے کے باعث صلاح الدین نورزئی شدید زخمی ہوئے اور موقع پر ہی دم توڑ گئے، فائرنگ کے بعد حملہ آور موقع سے فرار ہونے میں کامیاب ہوگئے۔
واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور علاقے کو گھیرے میں لے لیا۔ پولیس اہلکاروں نے جائے وقوعہ سے شواہد اکٹھے کرنا شروع کردیئے ہیں،واقعے سے متعلق مختلف پہلوؤں کا جائزہ لیا جا رہا ہے۔
مقتول کی لاش ضروری قانونی کارروائی کیلئے اسپتال منتقل کردی گئی، واقعے کی نوعیت اور محرکات جاننے کیلئے تفتیش جاری ہے۔
یہ بھی پڑھیں:لاہور ہائیکورٹ کے جسٹس محمد راحیل کامران شیخ مستعفی
ابتدائی طور پر فائرنگ کے واقعے کے محرکات سامنے نہیں آسکے، تاہم مختلف پہلوؤں سے تحقیقات کی جا رہی ہیں۔ پولیس نے ملزمان کی شناخت اور گرفتاری کیلئے کارروائی شروع کردی ہے۔
واقعے کے بعد علاقے میں خوف و تشویش کی فضا پھیل گئی، تاجر برادری اور اہلخانہ نے ملزمان کی فوری گرفتاری اور انہیں قانون کے کٹہرے میں لانے کا مطالبہ کیا ہے۔
