سوات میں زلزلے کے جھٹکے، شدت 5.0 ریکارڈ
زلزلے کے جھٹکے محسوس ہوتے ہی بعض علاقوں میں لوگ گھروں اور عمارتوں سے باہر نکل آئے۔
زلزلہ پیما مرکز اسلام آباد کے مطابق سوات اور ملحقہ علاقوں میں آنے والے زلزلے کی شدت ریکٹر اسکیل پر 5.0 ریکارڈ کی گئی۔ زلزلے کی زیرِ زمین گہرائی 224 کلومیٹر تھی جبکہ اس کا مرکز ہندوکش کے پہاڑی سلسلے میں بتایا گیا ہے۔
زلزلے کے جھٹکے سوات سمیت گردونواح کے مختلف علاقوں میں محسوس کیے گئے۔ اچانک زمین لرزنے سے شہریوں میں کچھ دیر کیلئے خوف و ہراس پھیل گیا اور متعدد افراد احتیاطاً اپنے گھروں، دکانوں اور دیگر عمارتوں سے باہر نکل آئے۔
زلزلہ پیما مرکز کے مطابق زلزلے کی گہرائی زیادہ ہونے کے باعث اس کے جھٹکے وسیع علاقے میں محسوس کیے جا سکتے ہیں۔ تاہم ابتدائی اطلاعات کے مطابق زلزلے کے نتیجے میں کسی قسم کے جانی یا مالی نقصان کی اطلاع موصول نہیں ہوئی۔
زلزلے کے جھٹکوں کے بعد شہریوں میں تشویش پائی گئی، تاہم کچھ دیر بعد صورتحال معمول پر آنا شروع ہوگئی۔ متعلقہ اداروں کی جانب سے بھی صورتحال پر نظر رکھی جا رہی ہے۔
واضح رہے کہ ہندوکش کا پہاڑی سلسلہ زلزلہ خیز خطہ ہے، جہاں وقتاً فوقتاً زلزلے کے جھٹکے محسوس ہوتے رہتے ہیں۔
یہ بھی پڑھیں:پنجاب بھر کے تعلیمی بورڈز نےنہم جماعت کے سالانہ نتائج کا اعلان کردیا
شہریوں کو کسی بھی ہنگامی صورتحال میں احتیاطی تدابیر اختیار کرنے اور سرکاری اداروں کی ہدایات پر عمل کرنے کی ہدایت کی گئی ہے۔
