مون سون کا آخری سپیل آج سے شروع ہوگا
محکمہ موسمیات کے مطابق مغربی ہوائیں پاکستان میں داخل ہوگئی ہیں، جس کے باعث آج دوپہر کے بعد بارشوں کا نیا سلسلہ شروع ہوسکتا ہے۔ اسلام آباد، راولپنڈی اور گردونواح میں تیز ہواؤں اور گرج چمک کے ساتھ موسلادھار بارش متوقع ہے۔
مری اور گلیات سمیت کشمیر اور گلگت بلتستان کے بالائی علاقوں میں بھی بارش کا امکان ظاہر کیا گیا ہے۔ بارشوں کے باعث پہاڑی علاقوں میں موسم مزید سرد اور خنک ہونے کی توقع ہے۔
محکمہ موسمیات کا کہنا ے کہ خیبرپختونخوا کے مختلف اضلاع دیر، سوات، کوہستان، بٹگرام، پشاور، نوشہرہ، ایبٹ آباد اور مانسہرہ میں بھی موسلادھار بارش ہوسکتی ہے۔
پنجاب کے جہلم، چکوال، اٹک، سیالکوٹ اور گجرات سمیت مختلف علاقوں میں تیز ہواؤں اور گرج چمک کے ساتھ بارش کی پیشگوئی کی گئی ہے۔
دوسری جانب سندھ اور بلوچستان کے بیشتر اضلاع میں موسم گرم رہنے کا امکان ہے، تاہم ساحلی علاقوں میں مطلع جزوی ابرآلود رہ سکتا ہے۔
محکمہ موسمیات نے شہریوں اور متعلقہ اداروں کو محتاط رہنے کی ہدایت کرتے ہوئے خبردار کیا ہے کہ بارشوں کا یہ سلسلہ 6 ستمبر تک جاری رہ سکتا ہے۔ بالائی اور پہاڑی علاقوں میں موسلادھار بارش کے باعث لینڈ سلائیڈنگ کا خطرہ بھی موجود ہے۔
یہ بھی پڑھیں:کم عمر اور بغیر لائسنس ڈرائیورز کی شامت آگئی
حکام نے ممکنہ صورتحال کے پیش نظر متعلقہ اداروں کو الرٹ رہنے اور احتیاطی تدابیر اختیار کرنے کی ہدایت کی ہے۔
