کم عمر اور بغیر لائسنس ڈرائیورز کی شامت آگئی
سی ٹی او لاہور سید عبدالرحیم شیرازی کے مطابق کم عمر ڈرائیورز کے خلاف صرف چالان نہیں کیا جائے گا بلکہ ان کی گاڑی یا موٹرسائیکل بھی بند کردی جائے گی۔ کم عمر ڈرائیور کی موٹرسائیکل صرف جووینائل پرمٹ پیش کرنے کی صورت میں چھوڑنے کی اجازت ہوگی۔
سی ٹی او لاہور کا کہنا ہے کہ چھٹی کے روز اکثر بچے گھروں سے موٹرسائیکل، گاڑی یا رکشہ لے کر سڑکوں پر آجاتے ہیں، جس سے حادثات کا خطرہ بڑھ جاتا ہے۔ شہریوں کی حفاظت اور محفوظ سفر کو یقینی بنانے کیلئے موٹرسائیکل پر تین سواروں کے خلاف بھی کارروائی کی جائے گی۔
انہوں نے واضح کیا کہ لرنر پرمٹ پر گاڑی چلانے کی اجازت نہیں، بغیر لائسنس گاڑی چلانے والے شخص پر 5 ہزار روپے جبکہ موٹرسائیکل چلانے پر 2 ہزار روپے جرمانہ عائد کیا جائے گا اور گاڑی یا موٹرسائیکل بھی بند کردی جائے گی۔
ٹریفک پولیس کی جانب سے لائسنس دفاتر کے باہر بھی خصوصی ہولڈ اپ کیا جائے گا، جہاں موٹرسائیکل سواروں کو موقع پر لائسنس بنوانے کی سہولت فراہم کرنے کے انتظامات کیے جائیں گے۔
سی ٹی او سید عبدالرحیم شیرازی نے سرکل افسران کو اپنی نگرانی میں کریک ڈاؤن یقینی بنانے کی ہدایت کردی ہے، ان کا کہنا ہے کہ کم عمر ڈرائیونگ اور بغیر لائسنس گاڑی یا موٹرسائیکل چلانا کسی صورت قابل قبول نہیں۔
یہ بھی پڑھیں:محکمہ موسمیات نے 5 ستمبر تک بارشوں کی پیشگوئی کردی
ٹریفک پولیس نے شہریوں سے بھی اپیل کی ہے کہ وہ کم عمر بچوں کو گاڑی یا موٹرسائیکل چلانے کیلئے نہ دیں اور ٹریفک قوانین کی پابندی کرکے حادثات کی روک تھام میں اپنا کردار ادا کریں۔
