عمران خان کی صحت پر تشویش، سہیل آفریدی کا عدالتی احکامات پر عملدرآمد کا مطالبہ

وزیراعلیٰ محمد سہیل آفریدی نے کہا کہ سپریم کورٹ نے عمران خان کے علاج کے لیے ان کی بہن اور ذاتی ڈاکٹرز کی موجودگی میں شفا انٹرنیشنل ہسپتال منتقل کرنے کا حکم دیا تھا، تاہم وفاقی حکومت نے مبینہ طور پر عدالتی حکم پر عملدرآمد کے بجائے فراڈ کیا اور عمران خان کو رات کے اندھیرے میں جعلی طریقے سے ہسپتال لایا گیا۔

انہوں نے کہا کہ خیبرپختونخوا حکومت عمران خان کی صحت کے حوالے سے انتہائی تشویش میں مبتلا ہے۔ ان کے مطابق وفاقی حکومت کی نگرانی میں عمران خان کی صحت خراب ہوئی ہے، جبکہ جب انہیں گرفتار کیا جا رہا تھا تو وہ مکمل طور پر صحت مند تھے۔

یہ بھی پڑھیں: سانحہ پمز: حکومت کا لواحقین کیلئے فی کس 50 لاکھ روپے امداد کا اعلان

سہیل آفریدی نے دعویٰ کیا کہ عمران خان کو گزشتہ آٹھ، نو ماہ سے مسلسل قیدِ تنہائی میں رکھا گیا ہے اور پاکستان کی تاریخ میں اس نوعیت کا رویہ پہلے کبھی نہیں دیکھا گیا۔ ان کا کہنا تھا کہ عمران خان کو درپیش صحت کے مسائل بھی اسی صورتحال کا نتیجہ ہیں۔

وزیراعلیٰ نے عدالتوں سے مطالبہ کیا کہ عمران خان کے حوالے سے جاری احکامات پر مکمل عملدرآمد کرایا جائے۔ انہوں نے کہا کہ عدالتی احکامات کو ردی کی ٹوکری میں پھینکنا عدلیہ اور ججز کی توہین کے مترادف ہے، جبکہ پوری قوم کی نظریں عدالتوں کی طرف ہیں اور عوام عدالتوں سے انصاف کی توقع رکھتے ہیں۔