پاکستان رینجرز پنجاب میں ملازمتوں کا اعلان
تفصیلات کے مطابق پاکستان رینجرز پنجاب میں سپاہی جنرل ڈیوٹی کے پانچویں گریڈ کی آسامیوں پر بھرتی کی جارہی ہے، ان ملازمتوں کیلئے ملک بھر سے امیدوار درخواستیں جمع کراسکتے ہیں۔
کامیاب امیدواروں کو ماہانہ تنخواہ کے علاوہ راشن الاؤنس اور وفاقی حکومت کے مروجہ قواعد کے مطابق دیگر منظور شدہ مراعات بھی فراہم کی جائیں گی۔
اعلان کے مطابق مجموعی 964 آسامیوں میں سے 72 نشستیں میرٹ پر مختص کی گئی ہیں، جبکہ پنجاب سے تعلق رکھنے والے امیدواروں کیلئے 50 فیصد کوٹہ رکھا گیا ہے، جس کے تحت 482 نشستوں پر پنجاب کے امیدوار درخواست دے سکیں گے۔
باقی نشستوں پر سندھ کے شہری و دیہی علاقوں، خیبر پختونخوا، بلوچستان، سابق فاٹا، گلگت بلتستان اور آزاد کشمیر سے تعلق رکھنے والے امیدواروں کو کوٹے کے مطابق موقع دیا جائے گا۔ مجموعی آسامیوں میں اقلیتی امیدواروں کیلئے بھی 5 فیصد کوٹہ مختص کیا گیا ہے۔
پاکستان رینجرز پنجاب کے مطابق امیدواروں کیلئے آن لائن رجسٹریشن کا عمل 17 اگست سے شروع ہے، جبکہ درخواستیں جمع کرانے کی آخری تاریخ 26 اگست 2026 مقرر کی گئی ہے۔
رجسٹریشن مکمل کرنے کے بعد امیدواروں کو اپنی منتخب کردہ رجسٹریشن سینٹر پر آن لائن سلپ پر درج تاریخ کو صبح 8 بجے پہنچنا ہوگا، امیدواروں کا طبی معائنہ، جسمانی ٹیسٹ اور تحریری امتحان لیا جائے گا۔
یہ بھی پڑھیں:بھارتی ساحل کے قریب مال بردار جہاز ڈوب گیا، 22 افراد لاپتہ
حکام نے امیدواروں کو ہدایت کی ہے کہ وہ مقررہ تاریخ سے قبل آن لائن رجسٹریشن مکمل کریں اور ٹیسٹ کیلئے ضروری دستاویزات اپنے ہمراہ لائیں۔
