گڈز ٹرانسپورٹرز کا کرایوں میں 10 فیصد کمی کا اعلان
آل پاکستان گڈز ٹرانسپورٹرز ایسوسی ایشن کے صدر نبیل محمود طارق نے ڈیزل کی قیمت میں کمی کے حکومتی فیصلے کا خیر مقدم کرتے ہوئے کہا ہے کہ ایندھن کی قیمت کم ہونے سے ٹرانسپورٹ کے شعبے کو ریلیف ملے گا اور تجارتی سامان کی ترسیل کے اخراجات میں بھی کمی آئے گی۔
نبیل محمود طارق کا کہنا تھا کہ ڈیزل کی قیمتوں میں نمایاں کمی کے بعد گڈز ٹرانسپورٹرز نے عوام اور کاروباری طبقے کو فائدہ منتقل کرنے کا فیصلہ کیا ہے، اس سلسلے میں مال بردار گاڑیوں کے کرایوں میں 10 فیصد کمی کی جائے گی۔
انہوں نے کہا کہ فیول کی قیمتوں میں کمی سے ٹرانسپورٹ انڈسٹری کو درپیش مالی مشکلات کم ہوں گی، جبکہ سامان کی ترسیل کے اخراجات میں کمی کا براہ راست فائدہ کاروباری افراد اور مختلف شعبوں کو پہنچنے کی توقع ہے۔
ایسوسی ایشن کے صدر نے حکومت کے فیصلے کو مثبت اقدام قرار دیتے ہوئے مطالبہ کیا کہ ڈیزل کی قیمت میں کمی اور اس کے نتیجے میں کم کیے گئے ٹرانسپورٹ کرایوں کو کم از کم ایک ہفتے تک برقرار رکھا جائے، تاکہ کاروباری طبقہ اور عوام اس ریلیف سے بھرپور فائدہ اٹھا سکیں۔
یہ بھی پڑھیں:عمران خان کی اسپتال منتقلی، وکیل نے جیل حکام کو اہم خط لکھ دیا
ان کا کہنا تھا کہ ٹرانسپورٹ کے اخراجات میں کمی سے اشیائے ضروریہ سمیت مختلف سامان کی نقل و حمل کی لاگت کم ہونے میں مدد مل سکتی ہے، جس کے مثبت اثرات مارکیٹ میں بھی سامنے آنے کی امید ہے۔
