حکومت کی جانب سے تاجروں کیلئے ریٹیلر اسکیم متعارف
وزیر خزانہ کے ہمراہ پریس کانفرنس کرتے ہوئے وزیر مملکت برائے خزانہ بلال اظہر نے بتایا کہ ریٹیلر اسکیم ایپ کا باقاعدہ اجرا کردیا گیا ہے اور اسے تاجروں کی مشاورت سے تیار کیا گیا ہے۔
انہوں نے کہا کہ یہ سہولت ان دکانداروں کے لیے بھی ہے جو ابھی تک نیٹ ٹیکس میں شامل نہیں، اب اس ایپ کے ذریعے چھوٹے تاجر بھی فائلر بن سکیں گے اور اپنا ٹیکس ریٹرن موبائل فون سے جمع کرا سکیں گے۔
بلال اظہر کیانی کے مطابق اسکیم میں شامل دکانداروں کو پوائنٹ آف سیلز کی شرط سے استثنیٰ دیا جائے گا تاہم انہیں کم از کم 25 ہزار روپے ٹیکس ادا کرنا ہوگا۔ رجسٹرڈ تاجروں کو گرین پلیٹ بھی جاری کی جائے گی اور جس دکان پر یہ پلیٹ نصب ہوگی وہاں ایف بی آر افسر داخل نہیں ہو گا۔
وزیر مملکت نے بتایا کہ ایپ میں رجسٹرڈ دکانداروں کی سیل پر 1٪ ٹیکس عائد ہوگا جبکہ ستمبر کے پہلے ہفتے تک ایپ مقامی زبانوں میں بھی دستیاب ہوگی۔
یہ بھی پڑھیں: وزیراعظم کی ڈیزل سستا کرنے کیلئے فوری اقدامات کی ہدایت
ان کا کہنا تھا کہ ریٹیلر اسکیم کے ذریعے لاکھوں تاجروں کو ٹیکس نیٹ میں لانے کی توقع ہے، اگر یہ منصوبہ کامیاب ہوا تو ٹیکس کا بوجھ تنخواہ دار طبقے پر کم کرنے میں مدد ملے گی۔
اس موقع پر وزیر خزانہ نے کہا کہ تنخواہ دار طبقے کیلئے بھی ٹیکس ریٹرن کا عمل آسان بنایا جارہا ہے اور سیلری کلاس کا ریٹرن فارم سادہ کیا جائے گا۔
