پاکستانیوں کے لیے بیرونِ ملک نوکریوں کا سنہری موقع
تفصیلات کے مطابق یونسکو کی جانب سے پی ون سے لے کرپی فائیو اور ڈائریکٹر لیول(ڈی ون ،ڈی ٹو) تک کی نشستیں پیش کی جا رہی ہیں۔ تعلیم، سائنس، ثقافت، انتظامیہ، فنانس، انجینئرنگ اور دیگر سماجی و انتظامی علوم سے تعلق رکھنے والے افراد ان مواقع سے فائدہ اٹھا سکتے ہیں۔
امیدوار کے پاس متعلقہ شعبے میں یونیورسٹی ڈگری، پیشہ ورانہ سند اور عملی تجربہ ہونا لازمی ہے۔ بہترین مواصلاتی مہارتوں کے ساتھ انگریزی اور فرانسیسی زبان پر عبور کو ترجیح دی جائے گی۔
یہ بھی پڑھیں: سعودی عرب کا عمرہ ویزا رکھنے والوں کیلئے اہم اعلان
منتخب افراد کو عالمی سطح کے منصوبوں پر کام کرنے کا موقع ملے گا جبکہ بنیادی تنخواہ کے ساتھ فیملی الاؤنس، بچوں کی تعلیم کے لیے مالی معاونت، سفری الاؤنسز اور دیگر مراعات یونسکو کے قوانین کے مطابق دی جائیں گی۔
خواہش مند امیدوار یونسکو کے مرکزی آن لائن کیریئر پورٹل (careers.unesco.org) پر جا کر اپنی درخواستیں جمع کروا سکتے ہیں تاہم منتخب افراد کو تکنیکی جانچ، تحریری ٹیسٹ اور انٹرویوز کے مراحل سے گزرنا ہوگا۔
بیورو آف امیگریشن نے ہدایت کی ہے کہ کسی غیر رسمی ایجنٹ یا تھرڈ پارٹی پورٹل پر بھروسہ نہ کریں اور تمام اسامیوں کی تصدیق براہِ راست یونسکو کی آفیشل ویب سائٹ سے کریں۔
