قتل کیس میں دیت کی رقم کتنی ہو گی؟ سپریم کورٹ نے فیصلہ محفوظ کرلیا
تفصیلات کے مطابق عدالتِ عظمیٰ نے مجرم ندیم خان کی اپیل پر فیصلہ محفوظ کیا ہے۔ دورانِ سماعت مجرم کے وکیل نے موقف اختیار کیا کہ کہ مجرم ندیم خان اپنی سزا پوری کر چکا ہے، اب صرف دیت کی رقم ادا نہ کرنے کی سزا کاٹ رہا ہے۔
پراسیکیوٹر ارشد حسین نے بتایا کہ یہ اپنی نوعیت کا پہلا کیس ہے، رقم کے تعین سے متعلق ہائی کورٹ کا فیصلہ موجود ہے، آج کل دیت کی رقم 1 کروڑ 97 لاکھ روپے ہے۔
جسٹس ہاشم کاکڑ نے استفسار کیا کہ دیت کی رقم وقوعہ، گرفتاری یا سزا کے وقت کے مطابق مقرر ہو گی؟
جسٹس صلاح الدین نے ریمارکس دیے کہ قتل کرنا تھوڑا منہگا ہو تو شاید لوگ رک جائیں، سعودی عرب میں آج بھی دیت کےطور پر 100 اونٹ دیے جاتے ہیں۔
جسٹس اشتیاق ابراہیم نے کہا کہ وقت پر فیصلہ نہ ہونا نظام کی خرابی ہے، نظام کی خرابی کی سزا ملزم کو نہیں دی جا سکتی۔
یہ بھی پڑھیں: عمران خان کے طبی معائنے اور جیل ملاقاتوں کی تفصیلات سپریم کورٹ میں پیش
پراسیکیوٹر ارشد حسین نے دلائل دیے کہ ملزم کی عمر کا تعین تو گرفتاری کے وقت سے ہوتا ہے۔
عدالت نے ہدایت کی کہ تمام پراسیکیوٹرز اس معاملے پر تحریری معروضات جمع کروا دیں۔
