بدین میں پسند کی شادی پر تنازع نے 60 گھر مسمار کر دیے
متاثرین کے مطابق واقعے کے دوران 60 سے زائد مکانات کو نقصان پہنچایا گیا اور پورا گاؤں خالی ہونے کی صورتحال پیدا ہوگئی۔ ان کا الزام ہے کہ مسلح افراد گھروں سے قیمتی سامان اور مویشی بھی لے گئے۔
مقامی افراد کے مطابق کارروائی کے نتیجے میں 600 سے زائد افراد نقل مکانی پر مجبور ہوئے اور کئی خاندان اپنے گھروں سے محروم ہوگئے۔
پولیس کے مطابق ندیم ماچھی اور عالیہ فاطمہ نے چند روز قبل اپنی پسند سے شادی کی تھی، جس کے بعد دونوں خاندانوں اور متعلقہ برادری کے درمیان تنازع پیدا ہوا۔
یہ بھی پڑھیں: نمرہ خان کی دوسری شادی بھی ختم، سابق شوہر نے طلاق کی تصدیق کردی
پسند کی شادی کرنے والے جوڑے کا کہنا ہے کہ انہوں نے اپنی مرضی سے شادی کی، تاہم اس ذاتی معاملے کی سزا پورے گاؤں کے لوگوں کو بھگتنا پڑ رہی ہے۔
متاثرین نے دعویٰ کیا ہے کہ انہوں نے معاملے کے حوالے سے ایس ایس پی بدین کو متعدد درخواستیں بھی جمع کرائیں، لیکن ان کے مطابق اب تک کوئی مؤثر کارروائی نہیں کی گئی۔
واقعے کے بعد متاثرہ خاندانوں نے مطالبہ کیا ہے کہ گھروں کی مسماری، مبینہ لوٹ مار اور نقل مکانی پر مجبور کیے جانے کے معاملے کی تحقیقات کی جائیں اور ذمہ دار افراد کے خلاف قانون کے مطابق کارروائی کی جائے۔
