مولانا فضل الرحمان کی بیرسٹر گوہر کے گھر آمد، والدہ کے انتقال پر اظہارِ تعزیت

مولانا فضل الرحمان نے بیرسٹر گوہر علی خان سے ملاقات کے دوران ان کی والدہ کے انتقال پر تعزیت کی اور مرحومہ کیلئے بلندی درجات اور مغفرت کی دعا کی۔

اس موقع پر مولانا فضل الرحمان نے کہا کہ ماں جیسی شفیق اور محبت کرنے والی ہستی کا دنیا سے چلے جانا یقیناً ایک بہت بڑا صدمہ ہے۔ انہوں نے سوگوار خاندان کے ساتھ ہمدردی کا اظہار کرتے ہوئے دعا کی کہ اللہ تعالیٰ مرحومہ کو اپنی جوارِ رحمت میں جگہ عطا فرمائے اور لواحقین کو صبر و حوصلہ دے۔

ملاقات کے دوران ملکی سیاسی صورتحال سمیت باہمی امور پر بھی مختصر گفتگو ہوئی، تاہم ملاقات کا بنیادی مقصد بیرسٹر گوہر علی خان سے ان کی والدہ کی وفات پر تعزیت کرنا تھا۔

اس موقع پر اپوزیشن اتحاد کے ترجمان اخونزادہ حسین یوسفزئی بھی موجود تھے۔ انہوں نے بھی بیرسٹر گوہر علی خان اور ان کے اہل خانہ سے اظہارِ افسوس کیا۔

بیرسٹر گوہر علی خان کی والدہ کے انتقال پر مختلف سیاسی و سماجی شخصیات کی جانب سے بھی تعزیتی پیغامات کا سلسلہ جاری ہے، رہنماؤں نے مرحومہ کیلئے مغفرت اور اہل خانہ کیلئے صبر جمیل کی دعا کی ہے۔

یہ بھی پڑھیں:کار بے قابو ہو کردرخت سے ٹکرا گئی، 5 افراد جاں بحق

تعزیتی ملاقات کے دوران مولانا فضل الرحمان نے کہا کہ والدین کا سایہ انسان کیلئے بہت بڑی نعمت ہوتا ہے اور ماں کی جدائی کا غم ناقابلِ تلافی ہے۔