ایم ڈی کیٹ 2026 کے امیدواروں کیلئے پورٹل کھولنے کا اعلان
پی ایم ڈی سی کے مطابق ایم ڈی کیٹ 2026 کیلئے آن لائن رجسٹریشن پورٹل 17 اگست سے 21 اگست 2026 تک دوبارہ کھولا جائے گا۔ یہ سہولت ان امیدواروں کیلئے فراہم کی گئی ہے جو پہلے مقررہ مدت کے دوران رجسٹریشن مکمل نہیں کرا سکے تھے۔
کونسل کے مطابق امیدوار مقررہ فیس کی ادائیگی کے بعد آن لائن رجسٹریشن کا عمل مکمل کرسکیں گے۔ امیدواروں کو ہدایت کی گئی ہے کہ وہ رجسٹریشن کے دوران فراہم کی جانے والی معلومات درست اور مکمل درج کریں تاکہ بعد میں کسی قسم کی دشواری کا سامنا نہ کرنا پڑے۔
پی ایم ڈی سی نے واضح کیا ہے کہ نامکمل درخواستوں کو منسوخ کرنے کا اختیار کونسل کے پاس محفوظ ہوگا، اس لیے امیدوار رجسٹریشن فارم جمع کرانے سے قبل تمام مطلوبہ معلومات اور دستاویزات کا جائزہ ضرور لیں۔
کونسل کے مطابق ایم ڈی کیٹ 2026 کا امتحان 20 ستمبر 2026 کو منعقد ہوگا۔ اس حوالے سے ٹیسٹ منعقد کرنے والی یونیورسٹیوں کو بھی ضروری نوٹس بھجوا دیے گئے ہیں۔
ایم ڈی کیٹ ملک بھر کے میڈیکل اور ڈینٹل کالجز میں داخلوں کے لیے اہم امتحان ہے، جس میں کامیابی امیدواروں کے لیے ایم بی بی ایس اور بی ڈی ایس پروگرامز میں داخلے کی راہ ہموار کرتی ہے۔
یہ بھی پڑھیں:بیرسٹر گوہر کی عمران خان سے ملاقات کی تردید
پی ایم ڈی سی نے امیدواروں کو ہدایت کی ہے کہ وہ رجسٹریشن، فیس، امتحانی طریقہ کار، ٹیسٹ سینٹرز اور دیگر اہم معلومات کے لیے کونسل کی سرکاری ویب سائٹ سے تازہ ترین تفصیلات حاصل کریں۔
امیدواروں کے لیے رجسٹریشن کی یہ اضافی مہلت داخلے کے عمل میں شامل ہونے کا اہم موقع ہے، اس لیے مقررہ تاریخ کے اندر درخواست مکمل کرنا ضروری ہوگا۔
