امتحان میں فیل ہونے پر گھر سے نکلا 14 سالہ لڑکا کراچی سے بازیاب
ڈسٹرکٹ ساؤتھ پولیس کے ترجمان کے مطابق 14 سالہ لڑکا فہیم لاہور سے لاپتا ہوا تھا اور بعد ازاں کراچی پہنچ گیا تاہم والدین نے لاہور میں اس کی گمشدگی کا مقدمہ بھی درج کرایا تھا۔
اطلاع ملنے پر تھانہ آرٹلری میدان پولیس نے کاروائی شروع کی اور مختلف ذرائع سے معلومات حاصل کرنے کے بعد بچے کا سُراغ لگایا، جس کے بعد پولیس ٹیم نے اسے کراچی سے بحفاظت تحویل لے لیا۔
پولیس کے مطابق ابتدائی معلومات میں سامنے آیا ہے کہ لڑکا امتحانات میں ناکامی پر دل برداشتہ تھا جس کے باعث وہ گھر سے نکل گیا تھا۔
یہ بھی پڑھیں: میر رضا قتل کیس: پولیس نے عدالت میں ابتدائی رپورٹ جمع کرا دی
ضروری قانونی کارروائی مکمل ہونے کے بعد بچے کو اس کے والدین کے حوالے کر دیا گیا، بچے کی بحفاظت واپسی پر والدین نے کراچی پولیس کا شکریہ ادا کیا۔
ترجمان کا کہنا ہے کہ ڈسٹرکٹ ساؤتھ پولیس شہریوں کی جان و مال کے تحفظ اور لاپتا افراد کی تلاش کے لیے اپنی زمہ داریاں بھرپور انداز میں انجام دے رہی ہے۔
