لانگ مارچ کا مقصد عمران خان کی رہائی نہیں بلکہ رسائی ہے: سہیل آفریدی

نجی نیوز چینل کے پروگرام کو خصوصی انٹرویو دیتے ہوئے سہیل آفریدی نے کہا کہ وہ خود لانگ مارچ کی قیادت کریں گے، یہ محض ایک روزہ احتجاج نہیں ہوگا بلکہ شرکا اسلام آباد پہنچنے کے بعد واپس نہیں جائیں گے۔

وزیراعلیٰ خیبرپختونخوا نے بتایا کہ لانگ مارچ کا اعلان پاکستان تحریک انصاف (پی ٹی آئی) اور تحریک تحفظ آئین پاکستان کے رہنماؤں سے مشاورت کے بعد کیا گیا ہے، علیمہ خان بھی اس تحریک میں ساتھ ہوں گی۔

سہیل آفریدی نے لانگ مارچ کے مقصد کی وضاحت کرتے ہوئے کہا کہ پاکستان تحریک انصاف عمران خان کی رہائی کا مطالبہ نہیں کررہی بلکہ ان تک رسائی چاہتی ہے، بانی پی ٹی آئی کی رہائی آئین اور قانون کے مطابق ہی ہوگی۔

27 ستمبر کی تاریخ تقریباً ڈیڑھ ماہ بعد مقرر کیے جانے سے متعلق سوال پر وزیراعلیٰ خیبرپختونخوا نے کہا کہ لانگ مارچ کی تیاری اور موسم کو مدنظر رکھتے ہوئے یہ تاریخ مقرر کی گئی ہے۔

انہوں نے کہا کہ تحریک کیلئے مناسب تیاری کا وقت درکار ہے، اسی لیے فوری طور پر لانگ مارچ کی تاریخ دینے کے بجائے 27 ستمبر کا انتخاب کیا گیا۔

یہ بھی پڑھیں:جعلی ٹریکنگ آئی ڈیز کا خطرہ، نادرا کا اہم الرٹ جاری

سہیل آفریدی کے اعلان کے بعد پاکستان تحریک انصاف (پی ٹی آئی) کے مجوزہ لانگ مارچ کے حوالے سے سیاسی حلقوں میں بحث مزید تیز ہوگئی ہے، جبکہ آئندہ دنوں میں اس کی تیاریوں اور حکمت عملی سے متعلق مزید تفصیلات سامنے آنے کا امکان ہے۔