جعلی ٹریکنگ آئی ڈیز کا خطرہ، نادرا کا اہم الرٹ جاری
نادرا ترجمان کے مطابق شہریوں کی ذاتی معلومات کے تحفظ کو یقینی بنانے کیلئے سوشل میڈیا پلیٹ فارمز کے کمنٹس میں ٹریکنگ آئی ڈی فراہم نہیں کی جائے گی۔
شہریوں کو ہدایت کی گئی ہے کہ وہ نادرا کے سوشل میڈیا اکاؤنٹس پر کمنٹس کے ذریعے اپنی ٹریکنگ آئی ڈی ہرگز شیئر نہ کریں۔
نادرا کی جانب سے واضح کیا گیا کہ شہری ادارے سے متعلق کسی بھی معاملے میں صرف سرکاری ذرائع اور تصدیق شدہ پلیٹ فارمز سے رجوع کریں تاکہ انہیں جعلی اکاؤنٹس، لنکس اور پیغامات کے ذریعے دھوکا دہی کا نشانہ نہ بنایا جا سکے۔
ترجمان کے مطابق شہری اپنی ٹریکنگ آئی ڈی سے متعلق معلومات حاصل کرنے کیلئے 8400 پر ایس ایم ایس سروس استعمال کرسکتے ہیں۔ اس کے علاوہ نادرا ہیلپ لائن 051-111-786-100 یا موبائل فون سے 1777 پر رابطہ کیا جاسکتا ہے۔
ذہن نشین رہے کہ نادرا نے شہریوں کو یہ سہولت بھی فراہم کر رکھی ہے کہ وہ اپنی ضروری معلومات اور متعلقہ خدمات کیلئے پاک آئی ڈی موبائل ایپ استعمال کریں۔
ادارے کی جانب سے عوام کو خاص طور پر مشورہ دیا گیا ہے کہ سوشل میڈیا پر موجود غیر مصدقہ لنکس، اکاؤنٹس اور پیغامات پر اعتماد کرنے سے گریز کریں اور اپنی شناختی دستاویزات، ٹریکنگ آئی ڈی سمیت دیگر ذاتی معلومات کسی غیر متعلقہ فرد یا غیر سرکاری پلیٹ فارم کے ساتھ شیئر نہ کریں۔
یہ بھی پڑھیں:سعودی شہزادے بندر بن منصور کی والدہ انتقال کرگئیں
نادرا نے شہریوں پر زور دیا ہے کہ محتاط رویہ اختیار کرتے ہوئے صرف مستند ذرائع سے حاصل کردہ معلومات پر ہی عمل کریں۔
