لاہور میں میٹرو بس سروس بند ہونے کا خدشہ
نجی آپریٹر نے ماس ٹرانزٹ اتھارٹی کو آگاہ کردیا ہے کہ موجودہ صورتحال میں میٹرو بسوں کا آپریشن مزید جاری رکھنا ممکن نہیں۔
نجی آپریٹر کے مطابق ماس ٹرانزٹ اتھارٹی نے عدالتی حکم کے مطابق 29 جولائی تک میٹرو بس سروس کیلئے ایندھن کا انتظام نہیں کیا، ایندھن کی عدم دستیابی کے باعث 11 اگست سے بسیں چلانا ممکن نہیں رہے گا۔
نجی کمپنی نے مؤقف اختیار کیا ہے کہ وہ اپنے مالی وسائل کے حوالے سے متعلقہ حکام کو پہلے ہی آگاہ کرچکے ہیں۔ کمپنی کے مطابق میٹرو بس سروس کو جاری رکھنے کیلئے ضروری اخراجات اور ایندھن کی فراہمی کا انتظام کرنا ماس ٹرانزٹ اتھارٹی کی ذمہ داری ہے۔
دوسری جانب ماس ٹرانزٹ اتھارٹی کے انچارج عزیر شاہ نے کہا ہے کہ حکومتی ہدایات کے بغیر میٹرو بس سروس کے حوالے سے کوئی حتمی فیصلہ نہیں کیا جاسکتا۔
عزیر شاہ کے مطابق موجودہ معاملے پر اگلے ہفتے عدالت میں اپنا مؤقف پیش کیا جائے گا، ان کا کہنا تھا کہ عدالت کی ہدایات اور حکومتی فیصلے کی روشنی میں آئندہ کا لائحہ عمل طے کیا جائے گا۔
خیال رہے کہ میٹرو بس سروس بند ہونے کی صورت میں روزانہ سفر کرنے والے ہزاروں شہری متاثر ہوسکتے ہیں، خصوصاً وہ مسافر جو ملازمت، تعلیم اور دیگر ضروری کاموں کیلئے اس سفری سہولت پر انحصار کرتے ہیں۔
یہ بھی پڑھیں:جعلی ٹریکنگ آئی ڈیز کا خطرہ، نادرا کا اہم الرٹ جاری
اب نظریں اگلے ہفتے ہونے والی عدالتی کارروائی پر ہیں، جس کے بعد لاہور میں میٹرو بس سروس کے مستقبل کے حوالے سے صورتحال مزید واضح ہونے کا امکان ہے۔
