پی آئی اے کی نجکاری کے بعد بڑے فیصلے
ذرائع کے مطابق پی آئی اے نے فوری طور پر دو طیارے ویٹ لیز پر حاصل کرنے کا فیصلہ کیا ہے۔
پی آئی اے بورڈ آف ڈائریکٹرز نے دو طیاروں کی ویٹ لیز پر فوری انڈکشن کی منظوری دے دی ہے، جبکہ دونوں طیارے رواں سال اکتوبر میں قومی ایئرلائن کے بیڑے میں شامل کیے جائیں گے۔
ذرائع کا کہنا ہے کہ ویٹ لیز پر حاصل کیے جانے والے دونوں طیارے خصوصی طور پر یورپی فلائٹ آپریشنز کے لیے استعمال ہوں گے۔ ابتدائی طور پر یہ طیارے 6 ماہ کی مدت کے لیے پی آئی اے کے بیڑے کا حصہ بنیں گے۔
ویٹ لیز کے تحت حاصل کیے جانے والے طیاروں کے لیے کپتان، فضائی میزبان اور دیگر ضروری عملہ فراہم کرنے والی کمپنی ہی ذمہ دار ہوگی، جس سے پی آئی اے کو فوری طور پر آپریشنل ضروریات پوری کرنے میں مدد ملے گی۔
پی آئی اے ذرائع کے مطابق نئے طیاروں کی شمولیت سے پروازوں کی تعداد میں اضافہ اور ایئرلائن کی آمدنی بہتر ہونے کی توقع ہے۔ کئی سال بعد قومی ایئرلائن کے بیڑے میں نئے طیاروں کی شمولیت کو انتظامیہ کی جانب سے آپریشنز میں توسیع کی اہم کوشش قرار دیا جا رہا ہے۔
ذرائع نے مزید بتایا کہ ویٹ لیز پر حاصل کیے جانے والے دونوں طیارے امریکی طیارہ ساز کمپنی بوئنگ کے ساتھ ممکنہ خریداری کے معاہدے سے الگ ہیں۔
یہ بھی پڑھیں:لائیو نشریات میں نیوز اینکر کو نیند آگئی، ویڈیو وائرل
واضح رہے کہ پی آئی اے نے گزشتہ ماہ بوئنگ کے امریکا میں قائم ہیڈکوارٹر کا دورہ بھی کیا تھا، جہاں 16 طیارے خریدنے کے حوالے سے بات چیت کی گئی تھی۔ ذرائع کے مطابق قومی ایئرلائن کے بیڑے میں توسیع کے لیے مزید اقدامات بھی زیر غور ہیں۔
