محسن نقوی وزیراعظم کو بھی جوابدہ نہیں، خواجہ آصف
نجی ٹی وی کو دیے گئے انٹرویو میں خواجہ آصف نے کہا کہ محسن نقوی وزیر داخلہ ہونے کے باوجود حکومتی نظام کا باقاعدہ حصہ دکھائی نہیں دیتے۔ انکے بقول انہوں نے محسن نقوی کو کابینہ کے صرف دو یا تین اجلاس میں دیکھا ہے۔
وزیر دفاع نے مزید کہا کہ وزیر داخلہ پارلیمنٹ کے اجلاسوں میں بھی بہت کم شریک ہوتے ہیں اور اب تک شاید سات یا آٹھ مرتبہ ہی ایوان میں آئے ہوں گے۔
خواجہ آصف کا کہنا تھا کہ محسن نقوی خود موجودہ نظام سے متعلق شکایات کررہے ہیں تو پھر حکومت کو اپنی کارکردگی پر سنجیدگی سے غور کرنا چاہیے "ایسی صورت میں تو ہمیں گھر چلے جانا چاہیے۔"
یہ بھی پڑھیں: ن لیگ کے سینئر رہنما اور ایم این اے ملک محمد اقبال چنڑ انتقال کرگئے
واضح رہے کہ اس سے قبل وزیر داخلہ محسن نقوی نے اپنے ایک بیان میں کہا تھا موجودہ انتظامی نظام اپنی افادیت کھو چکا ہے اور اگر یہی صورتحال برقرار رہی تو آئندہ دس برس بعد بھی ملک کو یہی مسائل کا سامنا ہوگا۔
انہوں نے موقف اختیار کیا تھا کہ پاکستان کی بہتری اور موثر انتظامی نظام کیلئے انتظامی یونٹس یا صوبوں کا قیام وقت کی اہم ضرورت بن چکا ہے۔
