لاہور میں کل مقامی تعطیل کا اعلان
تفصیلات کے مطابق محکمہ سروسز اینڈ جنرل ایڈمنسٹریشن ڈیپارٹمنٹ (ایس اینڈ جی اے ڈی) نے مقامی تعطیل کا نوٹیفکیشن جاری کر دیا ہے۔ نوٹیفکیشن کے تحت متعلقہ اضلاع میں ضلعی دفاتر اور ڈپٹی کمشنر کے ماتحت دفاتر بند رہیں گے۔
حکام کے مطابق اس مقامی تعطیل کا اطلاق پنجاب سول سیکرٹریٹ، خود مختار اداروں اور ریجنل دفاتر پر نہیں ہوگا، جبکہ معمول کے سرکاری امور ان اداروں میں جاری رہیں گے۔
دوسری جانب راولپنڈی میں چہلم حضرت امام حسینؓ کے مرکزی جلوس کے باعث ضلعی انتظامیہ کی ہدایت پر میٹرو بس سروس میں عارضی تبدیلی کی گئی ہے۔
میٹرو بس حکام کے مطابق شہریوں کی سہولت اور سیکیورٹی انتظامات کو مدنظر رکھتے ہوئے کچھ روٹس پر سروس محدود رکھی جائے گی۔
انتظامیہ نے بتایا کہ صدر اسٹیشن سے فیض آباد تک میٹرو بس سروس بند رہے گی، جبکہ آئی جے پی روڈ سے پاک سیکرٹریٹ تک میٹرو بس معمول کے مطابق چلتی رہے گی۔
انتظامیہ کے مطابق جلوس کے دوران سیکیورٹی اور ٹریفک انتظامات کے باعث بعض شاہراہوں پر آمدورفت متاثر ہو سکتی ہے۔
شہریوں کو ہدایت کی گئی ہے کہ سفر شروع کرنے سے پہلے ٹریفک پلان اور متبادل راستوں سے متعلق معلومات حاصل کر لیں تاکہ انہیں کسی پریشانی کا سامنا نہ کرنا پڑے۔
یہ بھی پڑھیں:بارشوں کے حوالے سے محکمہ موسمیات کی اہم پیشگوئی
حکام کا کہنا ہے کہ عوام کی سہولت، امن و امان کے قیام اور ٹریفک کی روانی برقرار رکھنے کے لیے تمام ضروری اقدامات کیے جا رہے ہیں، جبکہ صورتحال کے مطابق مزید فیصلے بھی کیے جا سکتے ہیں۔
