تھر پارکر میں آسمانی بجلی نے تباہی مچادی، باپ بیٹے سمیت 3 افراد جاں بحق

اطلاعات کے مطابق تھرپارکر کے مختلف علاقوں، چھاچھرو، اسلام کوٹ اور نگرپارکر میں گرج چمک کے ساتھ موسلادھار بارش ہوئی جہاں اسلام کوٹ میں بارش سے بچنے کے لیے دس مزدور ایک درخت کے نیچے جمع تھے کہ اچانک آسمانی بجلی ان پر آگری۔

حادثے کے نتیجے میں تاج محمد شاہ، ساجن میگھواڑ اور ان کا کم عمر بیٹا موقع پر ہی جاں بحق ہوگئے جبکہ تین زخمیوں کو فوری طور پر قریبی اسپتال میں منتقل کردیا گیا جہاں انہیں طبی امداد دی جا رہی ہے۔

یہ بھی پڑھیں: کراچی سے ابوظہبی جانے والا طیارہ بڑے حادثے سے بچ گیا

ضلعی انتظامیہ نے شہریوں سے اپیل کی ہے کہ بارش اور گرج چمک کے دوران کھلے میدانوں، درختوں اور بجلی کے کھمبوں کے قریب کھڑے ہونے سے گریز کریں اور احتیاطی تدابیر پر عمل کریں تاکہ کسی بھی ناخوشگوار واقعے سے بچا جا سکے۔