پی ٹی آئی رہنما عبداللہ طاہر قتل کیس میں 6 سہولت کار گرفتار
پولیس کے مطابق مرکزی منصوبہ ساز اور فائرنگ کرنے والے شوٹرز کی گرفتاری کیلئے مختلف مقامات پر چھاپے مارے جا رہے ہیں۔
پولیس ذرائع کے مطابق گرفتار کیے گئے ملزمان پر حملہ آوروں کی سہولت کاری کا الزام ہے، تفتیش کے دوران پولیس نے وہ گاڑی بھی اپنی تحویل میں لے لی ہے جس کے ذریعے مبینہ طور پر شوٹرز کو واردات کیلئے لایا گیا تھا۔
مذکورہ گاڑی گوجرانوالہ سے کرائے پر حاصل کی گئی تھی، ملزمان نے شناخت چھپانے کیلئے گاڑی پر جعلی نمبر پلیٹ نصب کی اور اسی گاڑی میں گلبرگ تک پہنچے، بعد ازاں انہوں نے منصوبہ بندی کے تحت موٹر سائیکل استعمال کرتے ہوئے کلینک کے قریب پہنچ کر کارروائی کی۔
پولیس کا کہنا ہے کہ گرفتار ملزمان سے اہم شواہد اور معلومات حاصل کی جا رہی ہیں، جن کی بنیاد پر مرکزی منصوبہ ساز اور فائرنگ میں ملوث شوٹرز تک پہنچنے کی کوششیں تیز کر دی گئی ہیں، قانون نافذ کرنے والے اداروں نے مختلف علاقوں میں چھاپوں کا سلسلہ بھی جاری رکھا ہوا ہے۔
یہ بھی پڑھیں:پی ٹی آئی رہنما عبداللہ طاہر کے شوٹرز کی شناخت نہ ہوسکی
یاد رہے کہ پی ٹی آئی رہنما عبداللہ طاہر کے قتل کے بعد واقعے نے سیاسی اور عوامی حلقوں میں تشویش پیدا کر دی تھی۔ پولیس کا مؤقف ہے کہ کیس کی ہر پہلو سے تحقیقات جاری ہیں اور تمام ذمہ دار عناصر کو قانون کے کٹہرے میں لایا جائے گا۔
