دریاؤں میں پانی کی سطح بلند، سیلابی الرٹ جاری
انتظامیہ نے دریاؤں کے قریب رہائش پذیر افراد کو احتیاطی تدابیر اختیار کرنے اور محفوظ مقامات پر منتقل ہونے کی ہدایت کی ہے۔
پی ڈی ایم اے پنجاب کے مطابق دریائے سندھ میں کالا باغ اور چشمہ کے مقامات پر نچلے درجے کا سیلاب ہے، جبکہ دریائے چناب میں بھی مختلف مقامات پر پانی کی سطح بلند ہوئی ہے۔
دریائے چناب میں مرالہ اور قادر آباد کے مقام پر نچلے درجے کی سیلابی صورتحال ہے، جبکہ خانکی کے مقام پر درمیانے درجے کا سیلاب ریکارڈ کیا گیا ہے۔
حکام کے مطابق کالا باغ کے مقام پر پانی کا بہاؤ 3 لاکھ 17 ہزار کیوسک جبکہ چشمہ کے مقام پر 2 لاکھ 95 ہزار کیوسک ریکارڈ کیا گیا ہے۔ مون سون بارشوں کے دوسرے اسپیل کے باعث پنجاب کے دریاؤں میں پانی کے بہاؤ میں مزید اضافے کا خدشہ ظاہر کیا گیا، جبکہ یہ بارشیں 24 جولائی تک جاری رہنے کی پیشگوئی ہے۔
پی ڈی ایم اے کے مطابق دریائے راوی، ستلج اور جہلم میں فی الحال پانی کا بہاؤ معمول کے مطابق ہے، تاہم بالائی علاقوں میں ہونے والی بارشوں کے باعث آئندہ دنوں میں دریاؤں کی صورتحال تبدیل ہو سکتی ہے، نالہ بئیں میں بھی نچلے درجے کی سیلابی کیفیت موجود ہے۔
ڈی جی پی ڈی ایم اے پنجاب عمر عباس میلہ نے شہریوں کو ہدایت کی ہے کہ وہ دریاؤں، نہروں اور ندی نالوں کے اطراف غیر ضروری نقل و حرکت اور سیر و تفریح سے گریز کریں۔
یہ بھی پڑھیں:یورپ پہنچنے کا خواب 143 تارکینِ وطن کو سمندر نگل گیا
انہوں نے کہا کہ حکومت پنجاب نے ممکنہ سیلاب سے متاثرہ علاقوں میں انتظامات مکمل کر لیے ہیں اور فلڈ ریلیف کیمپس میں بنیادی سہولیات، ادویات اور دیگر ضروری سامان فراہم کیا جائے گا۔
انہوں نے شہریوں بالخصوص والدین سے اپیل کی کہ بچوں کو دریاؤں اور ندی نالوں میں نہانے سے روکیں، جبکہ دریا عبور کرنے کیلئے صرف معیاری کشتیاں اور لائف جیکٹس استعمال کی جائیں۔
