فیلڈ مارشل سے کینیڈین وزیر خارجہ کی ملاقات، دو طرفہ تعلقات پر گفتگو
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر سے کینیڈا کی وزیر خارجہ انیتا آنند نے جی ایچ کیو راولپنڈی میں ملاقات کی۔
آئی ایس پی آر کے مطابق ملاقات میں باہمی دلچسپی کے امور ، علاقائی سلامتی اور پاک کینیڈا تعلقات پر تبادلۂ خیال کیا گیا۔
ترجمان پاک فوج کے مطابق ملاقات کے دوران فیلڈ مارشل سید عاصم منیر نے عالمی امن اور علاقائی استحکام کے لیے تعاون کی اہمیت پر زور دیا۔
یہ بھی پڑھیں: سرحد پار سے آنیوالی دہشتگردی کو پوری قوت سے کچل دیا جائیگا، فیلڈ مارشل
آئی ایس پی آر کے مطابق کینیڈا کی وزیر خارجہ انیتا آنند نے دہشت گردی کے خلاف پاکستان کی قربانیوں اور کامیابیوں کا اعتراف کیا اور خطے میں امن و استحکام کے فروغ کے لیے پاکستان کے تعمیری کردار کو سراہا۔
آئی ایس پی آر کے مطابق پاکستان اور کینیڈا نے دفاعی اور سکیورٹی تعاون مزید مضبوط بنانے کے عزم کا اعادہ کیا اور دونوں ممالک نے مشترکہ سکیورٹی چیلنجز سے نمٹنے کے لیے باہمی تعاون بڑھانے پر اتفاق کیا۔
