سرحد پار سے آنیوالی دہشتگردی کو پوری قوت سے کچل دیا جائیگا، فیلڈ مارشل
پاک فوج کے شعبہ تعلقات عامہ (آئی ایس پی آر) کے مطابق آرمی چیف ، چیف آف ڈیفنس فورسز فیلڈ مارشل سید عاصم منیر نے نیشنل ڈیفنس یونیورسٹی اسلام آباد کا دورہ کیا۔
آئی ایس پی آر کے مطابق نیشنل ڈیفنس یونیورسٹی آمد پر صدر این ڈی یو نے فیلڈ مارشل سید عاصم منیر کا استقبال کیا۔
نیشنل سکیورٹی اینڈ وار کورس کے گریجویٹنگ افسران سے خطاب کرتے ہوئے فیلڈ مارشل سید عاصم منیر کا کہنا تھا کہ جنگ کی نوعیت تیزی سے بدل رہی ہے، اس کے مطابق حکمتِ عملی اور عسکری تیاریوں کو بھی ہم آہنگ کیا جا رہا ہے۔
فیلڈ مارشل نے کہا کہ پاکستان کی مسلح افواج بدلتے جنگی تقاضوں کے مطابق اپنی آپریشنل اور ترقیاتی حکمتِ عملی ازسرِ نو ترتیب دے رہی ہیں، این ڈی یو جیسے ادارے مستقبل کی عسکری و سول قیادت کی تیاری میں کلیدی کردار ادا کر رہے ہیں۔
آرمی چیف کا کہنا تھا کہ دشمن انٹیلی جنس ایجنسیوں کی سرپرستی میں پاکستان کو غیر مستحکم کرنے کی تمام کوششیں ناکام ہوں گی، ریاست دشمن پراکسیز اور ان کے سہولت کار پاکستان کے امن، داخلی سلامتی اور معاشی استحکام کو نقصان نہیں پہنچا سکتے۔
چیف آف ڈیفنس فورسز نے کہا کہ سرحد پار سے آنے والی دہشت گردی کو ریاست پوری قوت سے کچل دے گی، دہشت گرد پراکسیز کی محفوظ پناہ گاہیں اور ان کے سہولت کار مکمل طور پر ختم کیے جائیں گے۔
یہ بھی پڑھیں: فتنہ الخوارج کا اسلام سے کوئی تعلق نہیں، ڈی جی آئی ایس پی آر
فیلڈ مارشل کا کہنا تھا کہ جنگیں میڈیا کے شور یا سیاسی نعروں سے نہیں بلکہ ایمان، اتحاد اور نظم و ضبط سے جیتی جاتی ہیں، پاکستان کی جنگ آزمودہ مسلح افواج کی پیشہ ورانہ صلاحیت، بلند حوصلے اور آپریشنل تیاری پر مکمل اعتماد ہے۔
آرمی چیف نے گریجویٹنگ افسران پر دیانت، بے لوث خدمت اور قومی ذمہ داری کے اعلیٰ اقدار اپنانے پر زور دیا۔
