مال بردار ٹرین پٹری سے اتر گئی، کراچی سے پنجاب کے درمیان ٹرینیں معطل

حادثہ وہاب شاہ ریلوے اسٹیشن کے قریب پیش آیا جہاں مال گاڑی کی متعدد بوگیاں ٹریک سے اتر گئیں، بوگیاں الٹنے اور ریلوے لائن کو نقصان پہنچنے کے باعث دونوں اطراف سے ٹرینوں کی آمدورفت روک دی گئی ۔

ریلوے حکام کے مطابق حادثے کے بعد کراچی آنے اور کراچی سے پنجاب سمیت ملک کے دیگر شہروں کی جانب جانے والی مسافر ٹرینوں کو مختلف اسٹیشنوں پر روک دیا گیا، ٹریک کو پہنچنے والے نقصان کے باعث ریلوے آپریشن 24 گھنٹے تک متاثر رہنے کا خدشہ ظاہر کیا گیا ہے۔

ڈی ایس ریلوے سکھر فرمان غنی نے بتایا کہ روہڑی سے امدادی ٹرین جائے حادثہ کی جانب روانہ کر دی گئی ہے جبکہ کوٹری سے بھی ریلیف ٹرین بھیجی گئی ہے، امدادی ٹیمیں بوگیوں کو ہٹانے اور متاثرہ ریلوے لائن کی بحالی کے لیے کام کریں گی۔

انہوں نے کہا کہ حادثے سے ٹریک کا بڑا حصہ متاثر ہوا ہے جس کی مکمل بحالی میں وقت لگ سکتا ہے تاہم اپ اور ڈاؤن دونوں ٹریک جلد از جلد کلیئر کرنے کی کوشش کی جا رہی ہے۔

حادثے کے باعث جیکب آباد سے کراچی جانے والی سکھر ایکسپریس منسوخ کر دی گئی جبکہ قراقرم ایکسپریس کو حیدرآباد، علامہ اقبال ایکسپریس کو کوٹری اور پاکستان ایکسپریس کو لانڈھی ریلوے اسٹیشن پر روک لیا گیا۔

یہ بھی پڑھیں: پاکستان ریلویز کا بلھے شاہ پسنجر ٹرین بحال کرنے کا فیصلہ

اسی طرح تیزگام ایکسپریس کو ڈرگ روڈ جبکہ ملت اور فرید ایکسپریس کو کراچی کینٹ اسٹیشن پر روک دیا گیا ہے۔

ریلوے حکام نے آئندہ روز تک متعدد ٹرینوں کی آمدورفت معطل رہنے کا امکان بھی ظاہر کیا ہے۔

پاکستان ریلویز کراچی ڈویژن کا کہنا ہے کہ حادثے اور ٹرینوں کی منسوخی سے متاثر ہونے والے مسافروں کو قواعد کے مطابق ٹکٹوں کی رقم واپس کی جائے گی۔