آج سے 23 جولائی تک ملک بھر میں موسلادھار بارشوں کی پیشگوئی
این ڈی ایم اے کے مطابق شدید مون سون اور مغربی ہوا کا طاقتور سلسلہ ملک میں داخل ہو چکا ہے جو 20 تا 23 جولائی گلگت بلتستان، خیبر پختونخوا، آزاد کشمیر اور بالائی پنجاب میں بعض مقامات پر موسلا دھار بارشوں کا سبب بنے گا، جس سے فلیش فلڈنگ اور ہل ٹورنٹس میں طغیانی کا اندیشہ ہے۔
الرٹ میں کہا گیا ہے کہ دریائے چناب کے مقام مارالہ اور دریائے جہلم کے منگلا کے بالائی حصے میں سیلابی ریلوں کا خدشہ ہے جبکہ دریائے کابل اور اس کے معاون دریاؤں، خصوصاً پنجکوڑہ، سوات اور چترال میں بھی پانی کی سطح میں اضافے اور طغیانی کا امکان ہے۔
این ڈی ایم اے نے خبردار کیا ہے کہ سیالکوٹ، نارووال، گجرات، مریدکے، ڈی جی خان، راجن پور، مری، گلیات، لوئر چترال، اپر و لوئر دیر، مالاکنڈ، شانگلہ، کوہستان، مانسہرہ، ایبٹ آباد، ہری پور، گلگت بلتستان اور آزاد کشمیر کے مختلف علاقوں میں فلیش فلڈنگ کا خدشہ ہے۔
الرٹ کے مطابق جڑواں شہروں راولپنڈی، اسلام آباد سمیت پشاور، گوجرانوالہ، گجرات، سیالکوٹ، نارووال، حافظ آباد، لاہور اور شیخوپورہ و دیگر شہروں کے نشیبی علاقوں میں اربن فلڈنگ کا بھی شدید خطرہ ہے۔
یہ بھی پڑھیں: گرج چمک کے ساتھ بارش کی پیشگوئی، الرٹ جاری
این ڈی ایم اے نے متعلقہ اداروں کو ہنگامی مشینری اور ریسکیو ٹیموں کو الرٹ رکھنے کی ہدایت کرتے ہوئے شہریوں سے کہا ہے کہ غیر ضروری سفر سے گریز کریں۔
ادارے کے مطابق برساتی نالوں، زیر آب سڑکوں، دریا کے کناروں اور لینڈ سلائیڈ کے خدشے والے علاقوں سے دور رہیں، جبکہ مستند معلومات اور حفاظتی ہدایات کے لیے پاک این ڈی ایم اے ڈیزاسٹر الرٹ ایپ سے رہنمائی حاصل کریں۔
