گرج چمک کے ساتھ بارش کی پیشگوئی، الرٹ جاری
وفاقی دارالحکومت، کشمیر، بالائی خیبرپختونخوا اور گلگت بلتستان کے بعض علاقوں میں گرج چمک کے ساتھ بارش کا امکان ہے، جبکہ لاہور اور کراچی سمیت کئی بڑے شہروں میں گرمی اور حبس برقرار رہنے کی توقع ہے۔
محکمہ موسمیات کے مطابق لاہور میں آج بارش کا کوئی امکان نہیں اور شہر میں شدید گرمی اور حبس کا سلسلہ برقرار رہے گا۔ آسمان صاف رہنے کے باعث سورج کی تپش میں مزید اضافہ متوقع ہے۔ شہر کا زیادہ سے زیادہ درجہ حرارت 39 ڈگری سینٹی گریڈ جبکہ کم سے کم 31 ڈگری سینٹی گریڈ رہنے کی پیشگوئی کی گئی ہے۔ لاہور میں تقریباً 5 کلومیٹر فی گھنٹہ کی رفتار سے ہوائیں چلیں گی جبکہ ہوا میں نمی کا تناسب 69 فیصد تک ریکارڈ کیا گیا ہے۔
محکمہ موسمیات کا کہنا ہے کہ اسلام آباد میں دن کے اوقات میں موسم گرم اور شدید حبس والا رہے گا، تاہم شام اور رات کے وقت بعض مقامات پر گرج چمک کے ساتھ بارش کا امکان موجود ہے۔ صبح کے وقت درجہ حرارت 26 ڈگری سینٹی گریڈ ریکارڈ کیا گیا، جبکہ دن میں پارہ 38 ڈگری سینٹی گریڈ تک پہنچ سکتا ہے۔ شہر میں 9 کلومیٹر فی گھنٹہ کی رفتار سے ہوائیں چلنے اور نمی کا تناسب 47 فیصد سے زائد رہنے کی توقع ہے۔
ادھر کشمیر اور بالائی خیبرپختونخوا میں دن کے دوران بھی گرج چمک کے ساتھ بارش کی پیشگوئی کی گئی ہے، جبکہ گلگت بلتستان میں مطلع جزوی ابر آلود رہنے کے ساتھ چند مقامات پر بارش متوقع ہے، جس سے موسم خوشگوار ہونے کا امکان ہے۔
دوسری جانب کراچی میں مطلع جزوی ابر آلود رہے گا، تاہم گرمی کی شدت برقرار رہے گی، سمندری ہواؤں کی وجہ سے حبس میں معمولی کمی آئے گی، لیکن شہریوں کو پھر بھی گرم موسم کا سامنا کرنا پڑے گا۔ صبح کے وقت شہر کا درجہ حرارت 30 ڈگری سینٹی گریڈ ریکارڈ کیا گیا، جبکہ دن کے دوران پارہ 35 ڈگری سینٹی گریڈ تک پہنچنے کا امکان ہے۔
یہ بھی پڑھیں:مریم نواز کا گھروں کی مرمت کیلئے بلاسود قرض پروگرام کا اعلان
محکمہ موسمیات نے شہریوں کو ہدایت کی ہے کہ شدید گرمی کے دوران غیر ضروری طور پر دھوپ میں نکلنے سے گریز کریں، زیادہ سے زیادہ پانی استعمال کریں اور بارش والے علاقوں میں احتیاطی تدابیر اختیار کریں تاکہ کسی بھی ممکنہ ناخوشگوار صورتحال سے بچا جا سکے۔
