پنجاب: ڈرائیونگ لائسنس بنوانا مزید آسان، نئی سہولت متعارف
پنجاب انفارمیشن ٹیکنالوجی بورڈ کے تحت قائم 15 ای خدمت مراکز پر شہریوں کو لرنر ڈرائیونگ لائسنس کے لیے درخواست جمع کرانے کی سہولت فراہم کی گئی ، ضروری کارروائی اور دستاویزات کی تصدیق مکمل ہونے کے بعد لرنر لائسنس موقع پر ہی جاری کر دیا جاتا ہے۔
حکام کے مطابق ای خدمت مراکز سے جاری ہونے والا لرنر ڈرائیونگ لائسنس چھ ماہ تک مؤثر رہے گا، شہری ان مراکز سے صبح 9 بجے سے شام 5 بجے تک اس سہولت سے استفادہ کر سکتے ہیں۔
لرنر لائسنس کے لیے درخواست دینے والے شہریوں کو متعلقہ شناختی دستاویزات اور مقررہ فیس کے ساتھ قریبی ای خدمت مرکز جانا ہوگا جبکہ مزید معلومات اور رہنمائی کے لیے شہری ای خدمت کی ویب سائٹ یا ہیلپ لائن نمبر 1317 سے رابطہ کر سکتے ہیں۔
دوسری جانب پنجاب بھر کے شہریوں کے لیے ڈرائیونگ لائسنس کی تجدید کا عمل بھی آسان بنا دیا گیا ، اب شہری لائسنس مراکز کے بار بار چکر لگائے بغیر گھر بیٹھے موبائل فون کے ذریعے اپنے ڈرائیونگ لائسنس کی تجدید کے لیے درخواست دے سکیں گے۔
یہ بھی پڑھیں: آن لائن شناختی کارڈ بنوانے والوں کیلیے زبردست سہولت متعارف
دستک ایپ پر ڈرائیونگ لائسنس سے متعلق خدمات کی منتقلی کے بعد درخواست کا پورا عمل آن لائن کر دیا گیا ہے، درخواست گزار ایپ کے ذریعے اپنے کوائف درج کرنے، مطلوبہ دستاویزات اپ لوڈ کرنے اور مقررہ فیس ادا کرنے کے بعد درخواست جمع کرا سکتے ہیں۔
شہری اپنے لائسنس کی تیاری اور ڈیلیوری کی صورتحال بھی آن لائن ٹریک کر سکیں گے۔
حکام کے مطابق اس اقدام کا مقصد شہریوں کو سرکاری دفاتر کی طویل قطاروں سے بچانا اور ڈرائیونگ لائسنس کی خدمات کو زیادہ آسان اور شفاف بنانا ہے۔
