عطا تارڑ کی گاڑی کے قریب ہوائی فائرنگ، ملزم گرفتار
پولیس کے مطابق واقعہ گزشتہ رات ڈیفنس اے کی حدود میں اس وقت پیش آیا جب ایک کار سوار نوجوان نے وفاقی وزیر کی گاڑی کو اوور ٹیک کیا اور مبینہ طور پر ہوائی فائرنگ کی، واقعے کے بعد قانون نافذ کرنے والے اداروں نے فوری کارروائی کرتے ہوئے ملزم کا تعاقب کیا۔
پولیس کا کہنا ہے کہ ملزم کی گرفتاری کیلئے سیف سٹی اتھارٹی کے کیمروں اور جدید ٹیکنالوجی سے مدد لی گئی، جس کے نتیجے میں اسے اسلحے سمیت حراست میں لے لیا گیا، ملزم کے زیر استعمال گاڑی کو بھی تحویل میں لے کر مزید تفتیش شروع کر دی گئی ہے۔
دوسری جانب وفاقی وزیر اطلاعات عطا تارڑ نے واقعے کی تفصیلات بیان کرتے ہوئے کہا کہ وہ اپنے اہلِ خانہ کے ساتھ سفر کر رہے تھے کہ ایک گاڑی نے بائیں جانب سے ان کی گاڑی کو کراس کیا، گاڑی میں موجود نوجوان نے پانچ فائر کیے، جس کے بعد انہوں نے متعلقہ ناکے پر فوری اطلاع دی اور گاڑی کا تعاقب بھی کیا۔
یہ بھی پڑھیں:سیاحوں کی کار کھائی میں جا گری، 4 افراد جاں بحق
پولیس حکام کے مطابق واقعے کے تمام پہلوؤں کی تحقیقات جاری ہیں تاکہ فائرنگ کے محرکات اور ملزم کے ارادوں کا تعین کیا جا سکے۔ ابتدائی کارروائی مکمل ہونے کے بعد ملزم کیخلاف قانون کے مطابق مقدمہ درج کر کے مزید قانونی کارروائی عمل میں لائی جائے گی۔
