بیرسٹر گوہر نے مولانا فضل الرحمان کے بیان کی مخالفت کردی
انہوں نے کہا کہ شہدا پاکستان کا فخر ہیں اور ان کی قربانیوں کا احترام سب پر لازم ہے۔
اپنے ایک بیان میں بیرسٹر گوہر کا کہنا تھا کہ پی ٹی آئی کی پالیسی بالکل واضح ہے کہ دہشت گردی کیخلاف جنگ میں جانوں کا نذرانہ دینے والے شہدا پوری قوم کا اثاثہ ہیں، ملک سے دہشت گردی کے خاتمے کیلئے نیشنل ایکشن پلان پر مؤثر اور مکمل عملدرآمد ناگزیر ہے۔
چیئرمین پی ٹی آئی نے مزید کہا کہ ملک میں امن و امان کی صورتحال کو سیاسی پوائنٹ اسکورنگ کیلئے استعمال نہیں کرنا چاہیے، کیونکہ قومی سلامتی اور عوام کے تحفظ جیسے معاملات پر تمام سیاسی جماعتوں کو ذمہ داری کا مظاہرہ کرنا چاہیے۔
بیرسٹر گوہر نے آزاد کشمیر انتخابات کے حوالے سے بھی گفتگو کرتے ہوئے کہا کہ بائیکاٹ کے فیصلے کے خاتمے کیلئے مختلف تجاویز زیر غور ہیں۔
ان کے مطابق یہ معاملہ پارٹی کی پارلیمانی پارٹی کے سامنے رکھا جائے گا اور زمینی حقائق کو مدنظر رکھتے ہوئے حتمی فیصلہ کیا جائے گا۔
یہ بھی پڑھیں:اسمارٹ بجلی میٹرز کی تنصیب شروع
انہوں نے کہا کہ پارٹی فیصلے مشاورت کے عمل کے ذریعے کیے جائیں گے اور پارلیمانی پارٹی کے فورم پر تمام پہلوؤں کا جائزہ لیا جائے گا۔
