سپریم کورٹ: عمران خاں سے ملاقات کا کیس سماعت کیلئے مقرر
تفصیلات کے مطابق سپریم کورٹ نے بانی پاکستان تحریک انصاف (پی ٹی آئی) عمران خاں سے ملاقاتوں کی اجازت سے متعلق درخواستوں کو سماعت کیلئے مقرر کر دیا ہے۔ کیس کی سماعت جسٹس محمد علی مظہر کی سربراہی میں قائم تین رکنی بینچ کرے گا۔
عدالت کے روبرو مشال یوسفزئی اور عظمیٰ خان کی جانب سے دائر درخواستوں پر غور کیا جائے گا، جن میں مؤقف اختیار کیا گیا ہے کہ انہیں بانی پی ٹی آئی سے ملاقات کی اجازت دی جائے۔ درخواست گزاروں کا کہنا ہے کہ ملاقاتوں پر عائد پابندیوں اور انتظامی اقدامات کا عدالتی جائزہ لیا جانا چاہیے۔
گزشتہ سماعت کے دوران سپریم کورٹ نے سپرنٹنڈنٹ اڈیالہ جیل اور ایڈووکیٹ جنرل اسلام آباد کو نوٹس جاری کرتے ہوئے تفصیلی جواب طلب کیا تھا۔
عدالت نے ہدایت کی تھی کہ ملاقاتوں سے متعلق اختیار کیے گئے اقدامات، قانونی بنیاد اور سرکاری مؤقف تحریری طور پر پیش کیا جائے تاکہ تمام پہلوؤں کا جائزہ لیا جا سکے۔
ذرائع کے مطابق آئندہ سماعت میں عدالت متعلقہ حکام کی جانب سے جمع کرائے گئے جوابات کا تفصیلی جائزہ لے گی اور اس کے بعد درخواستوں پر مزید قانونی کارروائی اور ممکنہ احکامات جاری کیے جا سکتے ہیں۔
یہ بھی پڑھیں:وزیراعلیٰ سہیل آفریدی نے وفاق کو دوٹوک پیغام دے دیا
یہ معاملہ گزشتہ کئی ہفتوں سے قانونی اور سیاسی حلقوں میں توجہ کا مرکز بنا ہوا ہے، 20 جولائی کی سماعت کو اس کیس میں اہم پیش رفت کے طور پر دیکھا جا رہا ہے۔
