کامن ویلتھ اور چینی اسکالرشپس کے خواہشمند طلبہ کیلئے بڑی خوشخبری
ایچ ای سی کے مطابق ایم ایس، ایم فل اور پی ایچ ڈی اسکالرشپس کے حصول کے خواہشمند امیدواروں کیلئے یہ خصوصی ٹیسٹ ضروری قرار دیا گیا ہے۔
اسپیشل ہیٹ ٹیسٹ کیلئے آن لائن رجسٹریشن کا آغاز 19 جولائی 2026 سے ہوگا، جبکہ امیدوار 3 اگست 2026 تک اپنی رجسٹریشن مکمل کر سکیں گے۔
ہائر ایجوکیشن کمیشن کی جانب سے جاری کردہ اعلامیے کے مطابق اسپیشل ہیٹ ٹیسٹ 30 اگست 2026 کو منعقد کیا جائے گا۔ ٹیسٹ کے انتظامات ایچ ای سی کی ایجوکیشن ٹیسٹنگ کونسل کے ذریعے کیے جائیں گے۔
ایچ ای سی نے واضح کیا ہے کہ کامن ویلتھ اور چائنیز گورنمنٹ اسکالرشپس کیلئے درخواست دینے والے امیدواروں کیلئے یہ ٹیسٹ لازمی ہوگا۔ امیدواروں کو ہدایت کی گئی ہے کہ وہ مقررہ تاریخ کے اندر ایچ ای سی کے آن لائن پورٹل پر جا کر رجسٹریشن کا عمل مکمل کریں۔
حکام کے مطابق اسپیشل ہیٹ ٹیسٹ کا مقصد اسکالرشپ پروگرامز کیلئے امیدواروں کی تعلیمی صلاحیت اور اہلیت کا جائزہ لینا ہے تاکہ میرٹ کی بنیاد پر طلبہ کا انتخاب کیا جا سکے۔
کامن ویلتھ اور چینی اسکالرشپس پاکستانی طلبہ کیلئے بیرونِ ملک اعلیٰ تعلیم کے اہم مواقع فراہم کرتی ہیں، جن کے ذریعے امیدوار مختلف شعبوں میں ماسٹرز، ایم فل اور پی ایچ ڈی کی تعلیم حاصل کر سکتے ہیں۔
یہ بھی پڑھیں:ایم ڈی کیٹ کیلے ایک لاکھ 38 ہزار طلبہ کی رجسٹریشن
ایچ ای سی نے امیدواروں کو مشورہ دیا ہے کہ وہ رجسٹریشن، ٹیسٹ شیڈول اور دیگر ضروری معلومات کیلئے کمیشن کی جانب سے جاری کردہ ہدایات پر عمل کریں اور مقررہ وقت کے اندر تمام مراحل مکمل کریں۔
