ایم ڈی کیٹ کیلے ایک لاکھ 38 ہزار طلبہ کی رجسٹریشن
پاکستان بھر میں میڈیکل تعلیم کے خواہشمند امیدوار اب داخلہ ٹیسٹ کی تیاریوں میں مصروف ہیں۔
ایم ڈی کیٹ ٹیسٹ 2026 اتوار 16 اگست کو صبح 10 بجے ملک بھر میں بیک وقت منعقد کیا جائے گا، امتحان کے انعقاد کیلئے مختلف صوبوں اور علاقوں میں ذمہ داریاں متعلقہ جامعات کو سونپ دی گئی ہیں تاکہ شفاف اور منظم طریقے سے ٹیسٹ مکمل کیا جا سکے۔
تفصیلات کے مطابق پنجاب میں ایم ڈی کیٹ ٹیسٹ کے انعقاد کی ذمہ داری یونیورسٹی آف ہیلتھ سائنسز لاہور کو دی گئی ہے، جبکہ سندھ میں سکھر آئی بی اے یونیورسٹی، خیبر پختونخوا میں خیبر میڈیکل یونیورسٹی اور بلوچستان میں بولان یونیورسٹی آف میڈیکل اینڈ ہیلتھ سائنسز کوئٹہ امتحانی انتظامات سنبھالیں گی
اسلام آباد، آزاد کشمیر اور گلگت بلتستان میں ٹیسٹ کے انعقاد کی ذمہ داری شہید ذوالفقار علی بھٹو میڈیکل یونیورسٹی اسلام آباد کو دی گئی ہے۔ اسی یونیورسٹی کو سعودی عرب کے شہر ریاض میں قائم امتحانی مرکز کے انتظامات کی ذمہ داری بھی سونپی گئی ہے۔
پاکستان میڈیکل اینڈ ڈینٹل کونسل (پی ایم ڈی سی) کے مطابق بلوچستان سے تعلق رکھنے والے طلبہ کی سہولت کے لیے اسلام آباد میں بھی اضافی ایم ڈی کیٹ ٹیسٹ سینٹر قائم کیا جائے گا۔ بولان یونیورسٹی آف میڈیکل سائنسز اس اضافی مرکز کے انتظامات مکمل کرے گی، جس سے بلوچستان ڈومیسائل رکھنے والے امیدوار فائدہ اٹھا سکیں گے۔
یہ بھی پڑھیں:کرپٹو کرنسی جائز ہے، پہلے بھی فتویٰ جاری کر چکے ہیں، مولانا بشیر فاروق
پی ایم ڈی سی کے مطابق ایم ڈی کیٹ 2026 کے لیے ریگولر فیس کے ساتھ رجسٹریشن کی آخری تاریخ 13 جولائی مقرر تھی، جبکہ لیٹ فیس کے ساتھ رجسٹریشن کا عمل 18 جولائی تک جاری رہے گا۔
حکام کا کہنا ہے کہ ٹیسٹ کے انعقاد کے لیے تمام ضروری انتظامات مکمل کیے جا رہے ہیں تاکہ امیدواروں کو بہتر اور شفاف امتحانی ماحول فراہم کیا جا سکے۔
