ریاض: گیس سلنڈر دھماکہ، 5 پاکستانی محنت کش جاں بحق
ابتدائی اطلاعات کے مطابق جاں بحق ہونے والے تمام افراد کا تعلق خیبر پختونخوا کے ضلع مانسہرہ سے ہے، جاں بحق افراد کی شناخت محمد سعید، عابد حسین، عبدالرحمان، محمد سفیر اور محمد رستم کے ناموں سے ہوئی ہے۔
ذرائع کے مطابق یہ افراد روزگار کے سلسلے میں سعودی عرب میں مقیم تھے اور دھماکے کے وقت متاثرہ مقام پر موجود تھے،تاہم دھماکے کی وجوہات کے بارے میں متعلقہ حکام کی جانب سے تحقیقات جاری ہیں۔
دوسری جانب ریاض میں قائم سفارت خانہ پاکستان نے افسوسناک واقعے پر گہرے دکھ اور افسوس کا اظہار کیا ہے۔ سفارت خانے کے مطابق حکام سعودی پولیس اور دیگر متعلقہ اداروں سے مسلسل رابطے میں ہیں تاکہ واقعے سے متعلق قانونی کارروائی جلد مکمل کی جا سکے۔
سفارت خانے نے مزید بتایا کہ تمام قانونی تقاضے پورے ہونے کے بعد مرحومین کی میتوں کو یا تو سعودی عرب میں ان کے اہل خانہ کی خواہش کے مطابق سپردِ خاک کیا جائے گا یا پھر انہیں پاکستان منتقل کرنے کیلئے ضروری انتظامات کیے جائیں گے۔
یہ بھی پڑھیں:750 روپے کے پرائز بانڈ کی قرعہ اندازی، خوش نصیبوں کا اعلان
واقعے کی خبر سامنے آنے کے بعد ضلع مانسہرہ میں جاں بحق افراد کے گھروں میں صفِ ماتم بچھ گئی ہے، جبکہ اہلِ علاقہ اور عزیز و اقارب کی بڑی تعداد تعزیت کیلئے متاثرہ خاندانوں کے گھروں کا رخ کر رہی ہے۔
پاکستانی کمیونٹی نے بھی واقعے پر گہرے رنج و غم کا اظہار کرتے ہوئے مرحومین کے درجات کی بلندی اور لواحقین کیلئے صبر جمیل کی دعا کی ہے۔
