نارنگ منڈی: خوفناک ٹریفک حادثہ، 4 افراد جاں بحق، متعدد زخمی
کالا خطائی روڈ پر سدھانوالی کے قریب دو مسافر بسیں بے قابو ہو کر کھیتوں میں جا گریں، افسوسناک حادثے کے نتیجے میں 4 مسافر جاں بحق جبکہ متعدد افراد زخمی ہو گئے۔
ریسکیو حکام کے مطابق حادثہ اس وقت پیش آیا جب تیز رفتار مسافر بسوں کے ڈرائیوروں نے سڑک پر موجود ایک کار اور موٹر سائیکل کو بچانے کی کوشش کی، اس دوران دونوں بسیں بے قابو ہو کر قریبی کھیتوں میں جا گریں۔
حادثے کی اطلاع ملتے ہی ریسکیو 1122، پولیس اور دیگر امدادی اداروں کی ٹیمیں فوری طور پر جائے وقوعہ پر پہنچ گئیں اور امدادی کارروائیاں شروع کر دیں۔
ریسکیو اہلکاروں نے بسوں میں پھنسے مسافروں کو نکالا اور زخمیوں کو ابتدائی طبی امداد فراہم کرنے کے بعد قریبی ہسپتالوں میں منتقل کر دیا۔
ریسکیو حکام کے مطابق حادثے میں 4 افراد موقع پر ہی جان کی بازی ہار گئے جبکہ متعدد زخمیوں کی حالت تشویشناک بتائی جا رہی ہے، جس کے باعث اموات میں اضافے کا خدشہ بھی ظاہر کیا گیا ہے۔
یہ بھی پڑھیں: طوفانی بارش، کوہاٹ میں چھت گرنے سے خاندان کے 9 افراد جاں بحق
حکام کے مطابق حادثے کا شکار ہونے والی ایک بس لاہور جبکہ دوسری نارووال جا رہی تھی، دونوں بسوں میں بڑی تعداد میں مسافر سوار تھے۔
پولیس نے جائے حادثہ کو گھیرے میں لے کر شواہد اکٹھے کرنا شروع کر دیے ہیں جبکہ حادثے کی اصل وجوہات جاننے کے لیے تحقیقات کا آغاز کر دیا گیا ہے۔
ابتدائی طور پر حادثے کی وجہ تیز رفتاری اور کار و موٹر سائیکل کو بچانے کی کوشش بتائی جا رہی ہے۔
