جعلی کال سینٹر بے نقاب، پیپلز پارٹی کا مقامی عہدیدار گرفتار

نیشنل سائبر کرائم انویسٹی گیشن ایجنسی (این سی سی آئی اے) نے کراچی کے علاقے گلستان جوہر میں کاروائی کرتے ہوئے جعلی کال سینٹر سے مبینہ تعلق کے الزام میں پاکستان پیپلز پارٹی کے مقامی عہدیدار حیدر عمرانی کو گرفتار کر لیا ہے، ذرائع کے مطابق ٹیم نے ایک ہوٹل پر چھاپہ مارکر ملزم کو حراست میں لیا ہے۔

حکام کا کہنا ہے کہ گرفتار ملزم سے تفتیش جاری ہے جبکہ کال سینٹر کے کے نیٹ ورک اور اس سے وابستہ دیگر افراد کے بارے میں بھی تحقیقات کا دائرہ وسیع کر دیا گیا ہے۔

یہ بھی پڑھیں: ماجد ستی قتل کیس میں فرخ کھوکھر کو عمر قید کی سزا

یاد رہے کہ چند روز قبل بھی این سی سی آئی اے نے ڈی ایچ اے فیز 2 ایکسٹینشن میں کاروائی کے دوران ایک منظم غیر قانونی کال سینٹر بے نقاب کیا تھا۔

ابتدائی تحقیقات میں انکشاف ہوا ہے کہ وہاں موجود ایجنٹس غیر ملکی بینکوں کے نمائندے بن کر اسپوفنگ کر ذریعے بیرون ملک شہریوں سے حساس مالی معلومات حاصل کرتے اور انہیں فراڈ کا نشانہ بناتے تھے۔

حکام کے مطابق ملزمان سوشل سکیورٹی نمبرز، فون نمبرز، تاریخ پیدائش، والدہ کے نام اور بینک کارڈ سے متعلق حساس معلومات حاصل کر کے مالی دھوکہ دہی میں ملوث تھے، اس معاملے میں مزید گرفتاریاں بھی متوقع ہیں۔